2024 جىلدىڭ جەلتوقسان ايىندا ماسكەۋدەن 4550 دانا ۆەيپ ساتىپ الىپ، ولاردى وزبەكستان اۋماعىنا زاڭسىز الىپ وتپەك بولعان وزبەكستاندىق ازامات ۇستالدى، دەپ حابارلايدى "ادىرنا" ۇلتتىق پورتالى Lada.kz-كە سىلتەمە جاساپ.
ول ءوز ەلىنىڭ شەكاراسىن كەسىپ وتە الماعان سوڭ، بۇل تاۋاردى قازاقستان ارقىلى جاسىرىن وتكىزىپ، كەيىن ساتۋدى جوسپارلاعان.
سوت بارىسىندا ايىپتالۋشىنىڭ كىناسى ونىڭ ءوز كىناسىن مويىنداۋىمەن، كۋاگەرلەردىڭ ايعاقتارىمەن، ساراپتاما قورىتىندىلارىمەن جانە باسقا دا قىلمىستىق ءىس ماتەريالدارىمەن تولىق دالەلدەندى. ەر ادام ءوز كىناسىن مويىنداپ، شىنايى وكىنەتىنىن ايتىپ، ەڭ جەڭىل جازا تاعايىنداۋدى سۇراعان.
قازاقستان رەسپۋبليكاسى قىلمىستىق كودەكسىنىڭ 301-1-بابىنىڭ 2-بولىمىنە سايكەس، ەلەكتروندىق تۇتىنۋ جۇيەلەرىن (ۆەيپتەردى) زاڭسىز اكەلۋ ءۇشىن ايىپپۇل، قوعامدىق جۇمىستارعا تارتۋ، باس بوستاندىعىن شەكتەۋ نەمەسە ەكى جىلعا دەيىن باس بوستاندىعىنان ايىرۋ جازاسى قاراستىرىلعان.
سوتتالۋشىنىڭ شىن جۇرەكتەن وكىنۋى، كىناسىن مويىنداۋى جانە ونىڭ ءتورت كامەلەتكە تولماعان بالاسىنىڭ بولۋى جازانى جەڭىلدەتەتىن جاعدايلار رەتىندە ەسكەرىلدى. ال اۋىرلاتاتىن ءمان-جايلار انىقتالعان جوق.
سوت ۇكىمى بويىنشا، وزبەكستان ازاماتى ءبىر جىلعا باس بوستاندىعىنان ايىرىلدى.
سوت ۇكىمى زاڭدى كۇشىنە ەندى.
