2024 jyldyń jeltoqsan aıynda Máskeýden 4550 dana veıp satyp alyp, olardy Ózbekstan aýmaǵyna zańsyz alyp ótpek bolǵan ózbekstandyq azamat ustaldy, dep habarlaıdy "Adyrna" ulttyq portaly Lada.kz-ke silteme jasap.
Ol óz eliniń shekarasyn kesip óte almaǵan soń, bul taýardy Qazaqstan arqyly jasyryn ótkizip, keıin satýdy josparlaǵan.
Sot barysynda aıyptalýshynyń kinási onyń óz kinásin moıyndaýymen, kýágerlerdiń aıǵaqtarymen, saraptama qorytyndylarymen jáne basqa da qylmystyq is materıaldarymen tolyq dáleldendi. Er adam óz kinásin moıyndap, shynaıy ókinetinin aıtyp, eń jeńil jaza taǵaıyndaýdy suraǵan.
Qazaqstan Respýblıkasy Qylmystyq kodeksiniń 301-1-babynyń 2-bólimine sáıkes, elektrondyq tutyný júıelerin (veıpterdi) zańsyz ákelý úshin aıyppul, qoǵamdyq jumystarǵa tartý, bas bostandyǵyn shekteý nemese eki jylǵa deıin bas bostandyǵynan aıyrý jazasy qarastyrylǵan.
Sottalýshynyń shyn júrekten ókinýi, kinásin moıyndaýy jáne onyń tórt kámeletke tolmaǵan balasynyń bolýy jazany jeńildetetin jaǵdaılar retinde eskerildi. Al aýyrlatatyn mán-jaılar anyqtalǵan joq.
Sot úkimi boıynsha, Ózbekstan azamaty bir jylǵa bas bostandyǵynan aıyryldy.
Sot úkimi zańdy kúshine endi.
