اقش-تىڭ الياسكا شتاتىندا Bering Air اۋە كومپانياسىنا تيەسىلى جولاۋشىلار ۇشاعى راداردان جوعالىپ، كەيىن اپاتقا ۇشىرادى، دەپ حابارلايدى "ادىرنا" ۇلتتىق پورتالى تاسس اگەنتتىگىنە سىلتەپ.
اپاتتان بورتتاعى 10 ادام قازا تاپتى.
Associated Press اگەنتتىگىنىڭ حابارلاۋىنشا، ۇشاق ۋنالاكليت قالاسىنان نوم قالاسىنا باعىت العان. بورتتا 9 جولاۋشى مەن 1 ۇشقىش بولعان. NBC News تەلەارناسى ۇشاقتىڭ نوم قالاسىنان وڭتۇستىك-شىعىسقا قاراي 54,7 كم جەردە اپاتقا ۇشىراعانىن حابارلادى.
وقيعانىڭ ناقتى سەبەپتەرى ءالى بەلگىسىز. قازىرگى تاڭدا اقش-تىڭ بەرەگوۆايا وحراناسى اپات ورنىندا ىزدەستىرۋ جۇمىستارىن جۇرگىزۋدە.
بۇل – اقش-تا سوڭعى ەكى اپتادا بولعان ءۇشىنشى ءىرى اۋە اپاتى.
ايتا كەتەيىك، قاڭتار ايىنىڭ سوڭىندا ۆاشينگتون ماڭىنداعى پوتوماك وزەنىنە جولاۋشىلار ۇشاعى مەن تىكۇشاق قۇلاپ، 67 ادام قازا تاپتى. اقپان ايىنىڭ باسىندا فيلادەلفيادا مەديتسينالىق ەۆاكۋاتسيالىق ۇشاق اپاتقا ۇشىراپ، 7 ادام كوز جۇمدى.
قازىرگى تاڭدا الياسكاداعى اۋە اپاتىنىڭ ءمان-جايى انىقتالىپ جاتىر.
كەشە باق بەتىندە ۇشاقتىڭ بەيسەنبى كۇنى اركتيكالىق شەڭبەردىڭ وڭتۇستىگىندەگى الياسكاداعى نورتون ساۋند ارقىلى ۇشىپ بارا جاتقاندا جوعالىپ كەتكەنى تۋرالى اقپارات تاراعان بولاتىن.
