بەيسەنبى كۇنى ءفيليپپيننىڭ وڭتۇستىگىندەگى كۇرىش القابىندا ۇشاق اپاتقا ۇشىراپ، اقش-تىڭ ءبىر اسكەري قىزمەتكەرى مەن پەنتاگوننىڭ ءۇش مەردىگەرى قازا تاپتى. ۇشاقتى امەريكاندىق اسكەريلەر جالداعان. بۇل تۋرالى اقش اسكەري باسقارماسى جاريالادى، دەپ حابارلايدى “ادىرنا” ۇلتتىق پورتالى.
حابارلامادا ۇشاقتىڭ ادەتتەگى تاپسىرمانى ورىنداپ جاتقاندىعى، ياعني فيليپپيندىك وداقتاستاردىڭ ءوتىنىشى بويىنشا بارلاۋ جانە باقىلاۋ جۇمىستارىن جۇرگىزىپ جاتقانى ايتىلعان. ۇشاقتىڭ قۇلاۋ سەبەپتەرى انىقتالۋدا.
فيليپپيندەردىڭ ازاماتتىق اۆياتسيا باسقارماسى دا ماگينداناو-دەل-سۋر پروۆينتسياسىندا جەڭىل ۇشاقتىڭ قۇلاعانىن راستادى، بىراق قوسىمشا مالىمەت بەرىلمەگەن.
قازا بولعان ءتورت ادامنىڭ دەنەلەرى امپاتۋان قالاسىنىڭ قيراندىلارىنان شىعارىلعانىن جەرگىلىكتى قاۋىپسىزدىك قىزمەتىنىڭ وكىلى امير دجەحاد تيم امبولودتو حابارلادى. اقش-تىڭ ءۇندى-تىنىق مۇحيتى قولباسشىلىعى ەكيپاج مۇشەلەرىنىڭ اتى-ءجونى ولاردىڭ تۋىستارى حابارلاندىرىلمايىنشا جاريا ەتىلمەيتىنىن اتاپ ءوتتى.
پروۆينتسياداعى اپاتتىق جاعدايلاردى جويۋ جونىندەگى كوورديناتور ۆيندي بيتي Associated Press اگەنتتىگىنە جەرگىلىكتى تۇرعىنداردان ۇشاق قۇلاعانعا دەيىن ءتۇتىن كورىپ، جارىلىس ەستىگەنىن حابارلاعانىن ايتتى. ءبيتيدىڭ ايتۋىنشا، اپات ورنى مەن ونىڭ ماڭىندا ەشكىم زارداپ شەكپەگەن، ال وقيعا ورنىن اسكەريلەر قورشاۋعا العان.
اقش اسكەريلەرى بىرنەشە ونجىلدىقتار بويى فيليپپيندەردىڭ وڭتۇستىگىندە اسكەري بازاعا ورنالاسىپ، يسلامشىل بۇلىكشىلەرمەن كۇرەسىپ جۇرگەن جەرگىلىكتى كۇشتەرگە كەڭەس بەرىپ، ولاردى وقىتىپ كەلەدى.
