بۇرىنعى ۇلتتىق ەكونوميكا ءمينيسترى بيشىمباەۆ قۋاندىق ۇستالدى. الدىن الا مالىمەت بويىنشا، ول دوستىق كوشەسى، 16-ۇيدە ورنالاسقان «باۋ» مەيرامحاناسىندا ايەلىن سوققىعا جىققان. ايەل العان جاراقاتتارىنان وقيعا ورنىندا كوز جۇمدى، دەپ حابارلايدى “ادىرنا” ۇلتتىق پورتالى Shyndyk.kz باسىلىمىنا سىلتەپ.
«ۇستالعان كەزدە بيشىمباەۆ ءوزىن پىشاقتايمىن دەپ قورقىتىپ، ءوز-وزىنە قول جۇمساماق بولعان. ول ەسىرتكىنىڭ اسەرىنەن بولعان بولۋى مۇمكىن»، دەيدى تەرگەۋدەگى دەرەككوزدەر.
ەستەرىڭىزگە سالا كەتەيىك، 19 قازاندا بيشىمباەۆ شارتتى تۇردە مەرزىمىنەن بۇرىن بوساتىلعان بولاتىن. ەكس-مينيستر 2018 جىلى ناۋرىزدا پارا الىپ، 1 ميلليارد تەڭگە ۇرلاعانى ءۇشىن 10 جىلعا سوتتالعان.
سوت ءتورت ايدان استام ۋاقىتقا سوزىلعان. ىسكە بيشىمباەۆپەن بىرگە تاعى 22 ادام قاتىستى: «بايتەرەك DEVELOPMENT» اق-نىڭ بۇرىنعى قىزمەتكەرلەرى، كاسىپكەرلەر مەن قۇرىلىس كومپانيالارىنىڭ وكىلدەرى.
ول ءبىر كەزدەرى ۇكىمەتتەگى ەڭ جاس باسشىلاردىڭ ءبىرى بولدى. «بولاشاق» باعدارلاماسى بويىنشا اقش-تا ءبىلىم العان.
2016 جىلدىڭ سوڭىندا تۇڭعىش پرەزيدەنت نۇرسۇلتان نازارباەۆ بيشىمباەۆ «بايتەرەك» حولدينگىن باسقارعان كەزدەگى قىزمەتىنە قاتىستى مينيستر قىزمەتىنەن بوساتىلعانىن حابارلادى.
قىلمىستىق ىزدەستىرۋ دەپارتامەنتى ءوز حابارلاماسىندا بيشىمباەۆتىڭ باس بوستاندىعىنان ايىرۋ كەزىندەگى «وڭ مىنەزدەمەسىن» جانە «سوت انىقتاعان تالاپتى وتەۋدى» اتاپ ءوتتى.
