قازاقستاندا ۇلتتىق ەكونوميكا مينيسترلىگىنىڭ بۇرىنعى باسشىسى قۋاندىق بيشىمباەۆتىڭ تۋىسى، سالتانات نۇكەنوۆانىڭ ولىمىنە بايلانىستى قىلمىتىق ءىس بويىنشا سوتتالعان باقىتجان بايجانوۆقا راقىمشىلىق جاسالدى. بۇل تۋرالى اقمولا وبلىستىق سوتىنىڭ ءباسپاسوز قىزمەتى مالىمدەدى، دەپ حابارلايدى “ادىرنا”.
مالىمەتكە سايكەس، سوت قىلمىستىق-اتقارۋ جۇيەسى مەكەمەسىنىڭ جازانى قىسقارتۋ تۋرالى ۇسىنىسىن قاناعاتتاندىرعان.
«قازاقستان رەسپۋبليكاسىنىڭ كونستيتۋتسياسىنىڭ 30 جىلدىعىنا وراي راقىمشىلىق جاساۋ تۋرالى زاڭعا سايكەس، سوتتالعان ب.-عا قاتىستى وتەلمەگەن جازا مەرزىمى ۇشتەن بىرگە قىسقارتىلىپ، تۇپكىلىكتى وتەۋ مەرزىمى 1 جىل 4 اي 17 كۇن دەپ بەلگىلەندى»، – دەلىنگەن سوتتىڭ حابارلاماسىندا.
وسىلايشا، باقىتجان بايجانوۆ تۇرمەدەن 2026 جىلعى قاراشادا بوستاندىققا شىعادى. ال باستاپقى ۇكىم بويىنشا ول 2027 جىلعى شىلدەدە بوستاندىققا شىعۋى ءتيىس بولعان.
سوت وكىلدەرى ەكس-ءمينيستردىڭ تۋىسىنان وندىرىلگەن ءماجبۇرلى تولەمدەر مەن پروتسەستىك شىعىنداردىڭ تولىقتاي وتەلگەنىن ناقتىلادى.
ەسكە سالا كەتەيىك، ۇلتتىق ەكونوميكا مينيسترلىگىنىڭ بۇرىنعى باسشىسى قۋاندىق بيشىمباەۆتىڭ ازاماتتىق جۇبايى سالتانات نۇكەنوۆانى ءولتىرۋ ءىسى بويىنشا سوت پروتسەسى وتكەن جىلدىڭ مامىرىندا اياقتالعان بولاتىن. ەكس-شەنەۋنىككە ەرەكشە قاتىگەزدىكپەن كىسى ءولتىرۋ جانە ازاپتاۋ ايىبى تاعىلىپ، ول 24 جىلعا باس بوستاندىعىنان ايىرىلعان.
بۇل ءىس بويىنشا باستى ايىپتالۋشىمەن قاتار ونىڭ ءىنىسى باقىتجان بايجانوۆ تا سوتتالدى. ول قىلمىستى جاسىرۋ بابى بويىنشا 4 جىلعا باس بوستاندىعىنان ايىرىلعان ەدى.
