Almatynyń qylmystyq ister jónindegi mamandandyrylǵan sotynda qala qurylysy basqarmasynyń burynǵy basshysy Almashan Ahmedjanov pen jer qatynastary bóliminiń burynǵy basshysy Ardaq Samambetovtiń isi boıynsha jaryssóz ótti, dep habarlaıdy “Adyrna” ulttyq portaly Massagetke siltep.
Prokýror Ahmedjanovty qyzmet babyn asyra paıdalandy jáne alaıaqtyq jasady dep aıyptap, 12 jylǵa bas bostandyǵynan aıyrýdy surady. Sondaı-aq, onyń múlkin tárkileý jáne memlekettik qyzmette jumys isteý quqyǵynan aıyrý usynyldy.
Tergeý málimetteri boıynsha, Ahmedjanov pen Samambetov Almatynyń taýly aımaqtarynda jeke turǵyn úı salýǵa arnalǵan jerlerge iri turǵyn úı keshenderin zańsyz salýǵa ruqsat bergen. Olar qujattardy rásimdeý barysynda zań buzýshylyqtarǵa jol berip, kadastrlyq tólemderdi aınalyp ótken.
Sonymen qatar, turǵyn úı kesheninde qabat sany men ǵımarattyń tyǵyzdyǵy boıynsha zań buzýshylyqtar anyqtalǵan. Tergeýshilerdiń málimetinshe, Ahmedjanov osy zańsyz áreketteriniń ornyna turǵyn úı keshenderinen týystaryna páter alǵan.
Prokýror sottalýshylardyń kishkentaı balalary baryn jazany jeńildetetin, al antty buzǵandaryn aýyrlatatyn mán-jaı retinde qarastyrýdy surady.
Sondaı-aq, prokýror Ardaq Samambetovti kináli dep tanyp, ony belgili bir laýazymdardy atqarý quqyǵynan ómir boıyna aıyrý jáne 12 jylǵa bas bostandyǵynan aıyrýdy surady.
Sottyń úkimi jaqyn kúnderi jarııalanady.
