كەشە، 26 مامىردا پرەزيدەنت جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ جاڭا قۇرامداعى العاشقى وتىرىسى ءوتتى. بۇل تۋرالى ايدا بالاەۆا Facebook پاراقشاسىنا جاريالادى، دەپ حابارلايدى “ادىرنا” ۇلتتىق پورتالى.
“ارينە، كوميسسيا بۇرىنعى قۇرامدا دا ناتيجەلى ەڭبەك ەتىپ، كوپتەگەن باياندى باستامالاردى كوتەرگەنى بەلگىلى. ونىڭ بارلىعى قوعامنان دا، حالىقارالىق دەڭگەيدە دە ءوز باعاسىن الدى. وسى قارقىننان قالماي الداعى ۋاقىتتا دا نەگىزگى مىندەتتەردى ىسكە اسىرۋدىڭ تەتىكتەرىن كۇشەيتە بەرەتىن بولامىز.
جاڭا قۇراممەن العاشقى جيىننىڭ رەفەرەندۋم قارساڭىندا ءوتۋىنىڭ ءمانى زور. كونستيتۋتسيالىق رەفورما – ازاماتتىق قوعامدى دامىتۋعا تىڭ سەرپىن بەرەتىن جاڭا مۇمكىندىك ەكەنى بەلگىلى. سوندىقتان ادىلەتتى ءارى قاۋىپسىز قوعام قۇرۋ جولىندا ەلىمىزدەگى ەڭ ۇلكەن ايەلدەر قوزعالىسىنا اينالىپ ۇلگەرگەن ۇلتتىق كوميسسياعا دا ۇلكەن جاۋاپكەرشىلىك ارتىلىپ وتىر. جاڭا قازاقستان قۇرۋدىڭ باستى قاعيدالارىنا ساي ۇلتتىق كوميسسيانىڭ جۇمىسى اشىق ءارى حالىققا تۇسىنىكتى بولۋى ءتيىس”، - دەدى ول.
سونداي-اق، ايدا بالاەۆا وتباسى ماسەلەسىنە دە توقتالۋ كەرەگىن باسا ايتىپ ءوتتى.
“الدىمەن وتباسىنىڭ ماسەلەسىن شەشپەي تۇرىپ، تۇتاس قوعامنىڭ دامۋى تۋرالى ءسوز ايتۋ ارتىق ەكەنى تۇسىنىكتى. وكىنىشكە وراي، بۇل باعىتتا ماسەلە جوق ەمەس. مىسالى، سوڭعى 5 جىل ىشىندە وتباسىلىق-تۇرمىستىق جانجال بويىنشا قىلمىستىق قۇقىق بۇزۋشىلىق 2 ەسەگە وسكەن. كامەلەتكە تولماعاندارعا قاتىستى جىنىستىق زورلىق كورسەتۋ قىلمىسى دا ءجيى ورىن الۋدا. ءاربىر ءۇشىنشى نەكە بۇزىلىپ، اجىراسقانداردىڭ ۇلەسى جىلدان جىلعا ارتۋدا. كامەلەت جاسقا تولماعان بالالارى بار جالعىزباستى انالاردىڭ دا قاتارى كوبەيۋدە...
سوندىقتان كوميسسيا جۇمىسىنا قاتىستى بىرقاتار وزگەرىستەر قابىلدادىق:
ءبىرىنشى، جۇمىس جۇرگىزۋ بارىسىن ناقتىلادىق.
ەكىنشى، جاڭا ۋاقىتتىڭ سىن-قاتەرلەرى مەن ولاردى شەشۋگە قاتىستى تەرەڭ تالداۋلار جاسالاتىن بولادى.
ءۇشىنشى، وڭىرلەردەگى احۋال ەرەكشە نازارعا الىنادى.
ءتورتىنشى، كوميسسيا جۇمىسىندا عىلىمي-تالداۋ باعىتىن دامىتامىز.
بەسىنشى، ناقتى سۋبەكتىلەرمەن تىكەلەي بايلانىس ورناتامىز.
التىنشى، حالىقارالىق ۇيىمدارمەن ءوزارا ىنتىماقتاستىق ورناتۋعا ايرىقشا كوڭىل بولىنەدى.
اۋقىمى كەڭ الداعى جۇمىس بارىسى تۋرالى جۇيەلى تۇردە جەدەل اقپارات بەرىپ وتىراتىن بولامىز”، - دەپ تۇيىندەدى ول.
“ادىرنا” ۇلتتىق پورتالى
