Qazaqstan Respýblıkasy Mádenıet jáne aqparat mınıstrliginiń keńeıtilgen alqa otyrysynda vedomstvo basshysy Aıda Balaeva kınoındýstrııany odan ári damytýǵa jáne «Qazaqfılmniń» tıimdi ári qarjylaı turaqty qyzmetin qamtamasyz etýge baǵyttalǵan negizgi mindetterge nazar aýdardy.
El Prezıdenti qol qoıǵan zańǵa sáıkes, Qazaqstanda túsiriletin fılmderdi qarjylandyrýdyń keminde 30%-y tikeleı «Qazaqfılmge» baǵyttalady.
«Memleketten bólinetin ár tıynnyń esebi, suraýy bar. Sondyqtan, bul qarajat saraptaýdan ótken laıyqty týyndylarǵa ǵana bólinedi. Eger fılm túsirýge nıetti azamattar óz jobasyna belgili bir paıyzdyq qarajat quıatyn bolsa, «Qazaqfılm» qalǵan qarajatty bólip, avtorlarmen birlese jumys isteıdi. Osylaısha, eki tarap ta memlekettik qarajatty qaıtarýǵa múddeli bolady», – dep atap ótti Aıda Balaeva.
Sońǵy bes jylda memlekettik qarjylandyrý esebinen Qazaqstanda 55 kórkem fılm túsirildi, onyń ishinde 2024 jyly 16 ulttyq fılm jaryqqa shyqqan. Al bıyl memlekettik qoldaý aıasynda 14 jańa týyndy jaryq kóredi dep josparlanyp otyr.
Sonymen qatar, ótken jyly «Qazaqanımaııa» shyǵarmashylyq birlestigi aıasynda 13 serııadan turatyn anımaııalyq fılmniń óndirisi aıaqtaldy. 2025 jyly osyndaı taǵy 10 joba júzege asyrylmaq.
Kásibı mamandar men kórermen tarapy otandyq serıaldar sapasynyń artqanyn atap ótýde. 2024 jyly memlekettik tapsyrys aıasynda 41 serıal túsirilip, kópshilikke usynyldy. Olardyń arasynda lýdomanııa, qarjy pıramıdalary, ınternet-alaıaqtyq jáne nashaqorlyqpen kúres týraly baıandaıtyn týyndylar da bar.
«Serıal óndirýshiler otandyq aýdıtorııamen ǵana shektelip qalmaı, serıaldardy halyqaralyq deńgeıge shyǵarý, shet elderge satý máselelerine de kóńil bólgen jón», – dedi mınıstr.
Sondaı-aq, mınıstr kınoteatrlarda kópshilik narazylyǵyn týdyratyn fılmderdi súzgiden ótkizý máselesin qozǵady. Atap aıtqanda, ádepsiz sózder men arazdyq týǵyzatyn sıýjetteri bar týyndylarǵa qatysty pikirin bildirdi.
Qazirgi ýaqytta mınıstrlik qazaqstandyq jáne sheteldik fılmderge prokattaý kýáligin berý boıynsha qoldanystaǵy zańnamany kúsheıtý jumystaryn júrgizýde.
