Qazaqstan Respublikasy Mädeniet jäne aqparat ministrlıgınıŋ keŋeitılgen alqa otyrysynda vedomstvo basşysy Aida Balaeva kinoindustriiany odan ärı damytuǧa jäne «Qazaqfilmnıŋ» tiımdı ärı qarjylai tūraqty qyzmetın qamtamasyz etuge baǧyttalǧan negızgı mındetterge nazar audardy.
El Prezidentı qol qoiǧan zaŋǧa säikes, Qazaqstanda tüsırıletın filmderdı qarjylandyrudyŋ kemınde 30%-y tıkelei «Qazaqfilmge» baǧyttalady.
«Memleketten bölınetın är tiynnyŋ esebı, sūrauy bar. Sondyqtan, būl qarajat saraptaudan ötken laiyqty tuyndylarǧa ǧana bölınedı. Eger film tüsıruge niettı azamattar öz jobasyna belgılı bır paiyzdyq qarajat qūiatyn bolsa, «Qazaqfilm» qalǧan qarajatty bölıp, avtorlarmen bırlese jūmys ısteidı. Osylaişa, ekı tarap ta memlekettık qarajatty qaitaruǧa müddelı bolady», – dep atap öttı Aida Balaeva.
Soŋǧy bes jylda memlekettık qarjylandyru esebınen Qazaqstanda 55 körkem film tüsırıldı, onyŋ ışınde 2024 jyly 16 ūlttyq film jaryqqa şyqqan. Al biyl memlekettık qoldau aiasynda 14 jaŋa tuyndy jaryq köredı dep josparlanyp otyr.
Sonymen qatar, ötken jyly «Qazaqanimasiia» şyǧarmaşylyq bırlestıgı aiasynda 13 seriiadan tūratyn animasiialyq filmnıŋ öndırısı aiaqtaldy. 2025 jyly osyndai taǧy 10 joba jüzege asyrylmaq.
Käsıbi mamandar men körermen tarapy otandyq serialdar sapasynyŋ artqanyn atap ötude. 2024 jyly memlekettık tapsyrys aiasynda 41 serial tüsırılıp, köpşılıkke ūsynyldy. Olardyŋ arasynda ludomaniia, qarjy piramidalary, internet-alaiaqtyq jäne naşaqorlyqpen küres turaly baiandaityn tuyndylar da bar.
«Serial öndıruşıler otandyq auditoriiamen ǧana şektelıp qalmai, serialdardy halyqaralyq deŋgeige şyǧaru, şet elderge satu mäselelerıne de köŋıl bölgen jön», – dedı ministr.
Sondai-aq, ministr kinoteatrlarda köpşılık narazylyǧyn tudyratyn filmderdı süzgıden ötkızu mäselesın qozǧady. Atap aitqanda, ädepsız sözder men arazdyq tuǧyzatyn siujetterı bar tuyndylarǧa qatysty pıkırın bıldırdı.
Qazırgı uaqytta ministrlık qazaqstandyq jäne şeteldık filmderge prokattau kuälıgın beru boiynşa qoldanystaǧy zaŋnamany küşeitu jūmystaryn jürgızude.
Ūqsas jaŋalyqtar
