اقش پرەزيدەنتى دونالد ترامپ ترانسگەندەر سپورتشى ايەلدەردىڭ ايەلدەر اراسىنداعى سپورتتىق جارىستارعا قاتىسۋىنا تىيىم سالاتىن جارلىققا قول قويدى. بۇل تۋرالى ول اق ۇيدە ايەلدەر مەن قىز سپورتشىلاردىڭ الدىندا مالىمدەدى، دەپ حابارلايدى "ادىرنا" ۇلتتىق پورتالى.
"بۇدان بىلاي ايەلدەر سپورتى تەك ايەلدەرگە ارنالعان", – دەدى ترامپ جارلىققا قول قويۋ راسىمىندە. سونداي-اق، اقش-تىڭ ترانسگەندەر سپورتشىلارعا ۆيزا بەرۋدەن باس تارتاتىنىن اتاپ ءوتتى.
جارلىق نەگىزىنەن مەكتەپتىك، ۋنيۆەرسيتەتتىك جانە اۋەسقوي جارىستارعا قاتىستى بولادى. الايدا، ترامپ 2028 جىلى لوس-اندجەلەستە وتەتىن وليمپيادا ويىندارىنا دەيىن حالىقارالىق وليمپيادا كوميتەتىنەن ترانسگەندەر سپورتشىلارعا قاتىستى ەرەجەلەردى قايتا قاراۋدى تالاپ ەتەتىنىن مالىمدەدى.
جارلىقتا "كوپتەگەن ءبىلىم بەرۋ مەكەمەلەرى مەن سپورتتىق قاۋىمداستىقتار ەر ادامدارعا ايەلدەر سپورتىندا جارىسۋعا رۇقسات بەردى. بۇل ايەلدەر ءۇشىن قورلاۋ، ادىلەتسىزدىك جانە قاۋىپ توندىرەدى، سونداي-اق ولاردى تەڭ مۇمكىندىكتەردەن ايىرادى" دەلىنگەن.
سونىمەن قاتار، ترامپ يناۋگۋراتسياسى كەزىندە اقش مەملەكەتتىك ساياساتى تەك ەكى جىنىستى – ەركەك جانە ايەل دەپ تانيتىنىن جاريالاپ، وسىعان سايكەس جارلىققا قول قويدى.
CNN مالىمەتىنشە، جارلىققا قول قويۋ الدىندا ترامپ وتكەن جىلعى پاريج وليمپياداسىندا ايەلدەر اراسىنداعى بوكس جارىستارىندا التىن مەدال جەڭىپ العان ەكى سپورتشىنىڭ ترانسگەندەر ەكەنىن ايتقان. الايدا، بۇل مالىمەت شىندىققا سايكەس كەلمەيدى. الجيرلىك يمان حەليف پەن تايۆاندىق لين يۋيتين جىنىسىن وزگەرتپەگەن جانە ءاردايىم ايەلدەر اراسىندا جارىسقان.
حالىقارالىق وليمپيادا كوميتەتىنىڭ پرەزيدەنتى توماس باح بۇل ەكى سپورتشىنىڭ ءاردايىم ايەل رەتىندە تانىلعانىن جانە ولاردىڭ گەندەرلىك سايكەستىگىنە ەشقاشان كۇمان تۋىنداماعانىن مالىمدەدى.
