تيمۋر قۇلىباەۆتىڭ كومپانياسى مەملەكەتكە 54 نىساندى قايتاردى، دەپ حابارلايدى “ادىرنا” ۇلتتىق پورتالى ۇلىسمەدياعا سىلتەپ.
2024 جىلى كاسىپكەر تيمۋر قۇلىباەۆتىڭ باقىلاۋىنداعى كومپانيا مەملەكەتكە 54 نىساندى وتكىزدى.
پروكۋراتۋرا مالىمەتىنشە، “كيپروس” جشس جانە “Joint Technologies” جشس ارقىلى باقىلاناتىن “تەك-قازاقستان” كومپانياسى مەملەكەتكە بىرنەشە ستراتەگيالىق اكتيۆتى قايتارعان. ولاردىڭ ىشىندە وتىن قويمالارى، عيماراتتار، قۇرىلىمدار، نەگىزگى قۇرالدار جانە “قورعاس” شەكارا ماڭى ىنتىماقتاستىق حالىقارالىق ورتالىعىنىڭ مۇلكى، باگاج تەرمينالى مەن جەر ۋچاسكەسى بار.
“مەملەكەت مەنشىگىنە وتىن قويمالارى، عيماراتتار مەن قۇرىلىمدار، نەگىزگى قۇرالداردان باسقا تەك-قازاقستان كومپانياسىنىڭ 54 نىسانىن بەرىلدى. "قورعاس" حشىو مۇلكى، باگاج تەرمينالى جانە جەر ۋچاسكەسى قايتارىلدى”، - دەلىنگەن حابارلامادا.
ەسكە سالا كەتەيىك، بۇعان دەيىن اكتيۆتەردى قايتارۋ كوميتەتى تيمۋر قۇلىباەۆپەن سوتتاسىپ جاتقانىن حابارلاعان بولاتىن.
قارجى ەسەبىنە سايكەس، قۇلىباەۆتىڭ Joint Resources حولدينگ كومپانياسى 2023 جىلدىڭ قورىتىندىسى بويىنشا 39,1 ملرد تەڭگە تازا پايدا تاپقان. حولدينگتىڭ نەگىزگى قىزمەتى اكتيۆتەردى باسقارۋ بولىپ تابىلادى.
