Ózbekstanda Reseı azamattaryn aldaǵan iri alaıaqtyq áshkerelendi, dep habarlaıdy “Adyrna” ulttyq portaly Ferǵanaǵa siltep.
Ózbekstannyń Memlekettik qaýipsizdik qyzmeti Reseı azamattarynan aqsha bopsalaýmen aınalysqan iri alaıaqtyq jelini anyqtady. Kúdiktiler Ferǵana men Tashkentte zańsyz «koll-ortalyqtar» uıymdastyryp, qońyraý shalý arqyly adamdardy aldaǵan.
Tergeý málimetteri boıynsha, 1986 jyly týǵan Ferǵana qalasynyń turǵyny 32 adamnan turatyn qylmystyq top qurǵan. Barlyq kúdiktiler qamaýǵa alynyp, olarǵa Ózbekstan Qylmystyq kodeksiniń 168-baby (Top bolyp jasalǵan alaıaqtyq) jáne 278-2-baby (Kompıýterlik aqparatqa zańsyz qol jetkizý) boıynsha is qozǵaldy.
Kúdiktiler Ferǵana qalasynda eki jáne Tashkentte bir «koll-ortalyq» ashyp, Reseı azamattarynyń jeke derekterin zańsyz paıdalanyp, olardy aldaý shemasyn uıymdastyrǵan. Alaıaqtar ınternet arqyly bıologııalyq belsendi qospalar (BAD) satyp alǵan adamdardyń baılanys derekterin qoldanyp, olarǵa Reseı tergeý organdarynyń qyzmetkerleri bolyp habarlasqan. Olar tutynýshylarǵa «BAD satýshylarynan keltirilgen moraldyq zııandy óteý úshin aqshalary qaıtarylady» dep sendirip, ony alý úshin tabys salyǵyn tóleý kerektigin aıtqan.
Qylmystyq top músheleri ózderin Reseı Qarjy mınıstrliginiń ókilderi retinde tanystyryp, qurbandardy arnaıy shottarǵa aqsha aýdarýǵa kóndirgen. Alaıaqtardyń qansha adamdy aldaǵany jáne olardyń jalpy qansha aqsha ıemdengeni týraly aqparat jarııalanǵan joq.
Sońǵy ýaqytta ınternet-alaıaqtyq qylmystyq toptar arasynda keń taraǵan ádiske aınalyp, halyqaralyq deńgeıge jetip otyr. Mysaly, 2024 jyldyń sáýirinde Ózbekstannyń Ystambuldaǵy Bas konsýldyǵy Túrkııaǵa baratyn azamattarǵa moshennıkterden saq bolý kerektigi týraly eskertý jasaǵan. Alaıaqtar jalǵan zańgerler men quqyq qorǵaý organdary qyzmetkerleri retinde ózin tanystyryp, túrli joldarmen adamdardan aqsha talap etken.
