كابۋلدا ايەلدەرگە ارنالعان جالعىز Radio Begum راديوستانتسياسى ءوز جۇمىسىن ۋاقىتشا توقتاتتى، دەپ حابارلايدى "ادىرنا" ۇلتتىق پورتالى CNN-گە سىلتەمە جاساپ.
راديوستانتسيانىڭ جابىلۋىنا رۇقساتسىز اقپارات پەن باعدارلامالاردى شەتەلدىك باق-قا تاراتۋى سەبەپ بولعان.
Radio Begum باسشىلىعىنىڭ مالىمدەۋىنشە، تاليباننىڭ اقپارات جانە مادەنيەت مينيسترلىگى راديوستانتسيا كەڭسەسىندە ءتىنتۋ جۇرگىزىپ، قىزمەتكەرلەردى ۋاقىتشا تۇتقىنداعان.
ءتىنتۋ بارىسىندا قۇقىق قورعاۋ ورگاندارى كومپيۋتەرلەر، قاتقىل ديسكىلەر، فايلدار جانە جۋرناليستەردىڭ تەلەفوندارىن تاركىلەگەن. سونىمەن قاتار، راديوستانتسيادا جۇمىس ىستەيتىن ەكى ەر ادام ۇستالعان. بىراق ولاردىڭ باسشىلىق قىزمەتكە قاتىسى جوق.
مينيسترلىك راديوستانتسيانىڭ حابار تاراتۋ ساياساتىن بۇزعانىن جانە ليتسەنزيانى ءتيىستى تالاپتارعا سايكەس پايدالانباعانىن العا تارتىپ، ونىڭ قىزمەتىن توقتاتتى. شەتەلدىك ارنالاردىڭ بىرىنە رۇقساتسىز كونتەنت بەرىلگەنى ايتىلعانىمەن، ناقتى قاي ارنا ەكەنى كورسەتىلمەگەن.
بۇل شەشىم حالىقارالىق قۇقىق قورعاۋ ۇيىمدارىنىڭ، سونىڭ ىشىندە "شەكاراسىز رەپورتەرلەر" (RSF) ۇيىمىنىڭ نارازىلىعىن تۋدىردى. ولار شەكتەۋدى دەرەۋ الىپ تاستاۋدى تالاپ ەتتى.
Radio Begum كۇنىنە التى ساعاتتىق ءبىلىم بەرۋ باعدارلامالارىن، دەنساۋلىق، پسيحولوگيا جانە رۋحانيات تاقىرىپتارىن قامتيتىن كونتەنت تاراتقان. راديوستانتسيانىڭ نەگىزگى ماقساتى – اۋعانستانداعى ايەلدەر مەن قىزدارعا ءبىلىم بەرۋ جانە قولداۋ كورسەتۋ بولعان. باسشىلىق ساياساتقا ارالاسپايتىنىن ەرەكشە اتاپ ءوتتى.
