Kabýlda áıelderge arnalǵan jalǵyz Radio Begum radıostanııasy óz jumysyn ýaqytsha toqtatty, dep habarlaıdy "Adyrna" ulttyq portaly CNN-ge silteme jasap.
Radıostanııanyń jabylýyna ruqsatsyz aqparat pen baǵdarlamalardy sheteldik BAQ-qa taratýy sebep bolǵan.
Radio Begum basshylyǵynyń málimdeýinshe, Talıbannyń aqparat jáne mádenıet mınıstrligi radıostanııa keńsesinde tintý júrgizip, qyzmetkerlerdi ýaqytsha tutqyndaǵan.
Tintý barysynda quqyq qorǵaý organdary kompıýterler, qatqyl dıskiler, faıldar jáne jýrnalısterdiń telefondaryn tárkilegen. Sonymen qatar, radıostanııada jumys isteıtin eki er adam ustalǵan. Biraq olardyń basshylyq qyzmetke qatysy joq.
Mınıstrlik radıostanııanyń habar taratý saıasatyn buzǵanyn jáne lıenzııany tıisti talaptarǵa sáıkes paıdalanbaǵanyn alǵa tartyp, onyń qyzmetin toqtatty. Sheteldik arnalardyń birine ruqsatsyz kontent berilgeni aıtylǵanymen, naqty qaı arna ekeni kórsetilmegen.
Bul sheshim halyqaralyq quqyq qorǵaý uıymdarynyń, sonyń ishinde "Shekarasyz reporterler" (RSF) uıymynyń narazylyǵyn týdyrdy. Olar shekteýdi dereý alyp tastaýdy talap etti.
Radio Begum kúnine alty saǵattyq bilim berý baǵdarlamalaryn, densaýlyq, psıhologııa jáne rýhanııat taqyryptaryn qamtıtyn kontent taratqan. Radıostanııanyń negizgi maqsaty – Aýǵanstandaǵy áıelder men qyzdarǵa bilim berý jáne qoldaý kórsetý bolǵan. Basshylyq saıasatqa aralaspaıtynyn erekshe atap ótti.
