ستوكگولمنەن 200 شاقىرىم قاشىقتىقتا ورنالاسقان ەرەبرۋ قالاسىنداعى ەرەسەكتەرگە ارنالعان وقۋ ورتالىعىندا بولعان اتىستان شامامەن 10 ادام قازا تاپتى، دەپ حابارلايدى "ادىرنا" ۇلتتىق پورتالى BBC-گە سىلتەمە جاساپ.
بۇل ورتالىق بالالار مەكتەبىنىڭ قاسىندا ورنالاسقان.
جەرگىلىكتى باسىلىمداردا بىرنەشە ادامنىڭ قايتىس بولعانى تۋرالى اقپارات بۇرىن دا تاراعان، الايدا رەسمي مالىمەتتەردە تەك التى ادامنىڭ جاراقات العانى ايتىلعان. پوليتسيا قۇرباندار تۋرالى تۇسىنىكتەمە بەرمەگەن ەدى.
كەيىن قالا پوليتسياسىنىڭ باسشىسى روبەرتو ەيد فورەست بۇل وقيعادان شامامەن 10 ادامنىڭ قازا تاپقانىن راستادى. ولاردىڭ اراسىندا شابۋىل جاساعان ادام دا بولۋى مۇمكىن.
ازىرگە تەراكت بەلگىسى انىقتالماعان.
ء"بىز بۇل قىلمىستى جالعىز ادام جاسادى دەپ ويلايمىز. وقيعا كىسى ولتىرۋگە وقتالۋ، ءورت قويۋ جانە قارۋلى شابۋىل رەتىندە قاراستىرىلۋدا،" – دەلىنگەن پوليتسيا مالىمدەمەسىندە.
كۋاگەرلەر مەن بۇقارالىق اقپارات قۇرالدارىنىڭ حابارلاۋىنشا، مەكتەپ ماڭىندا ون شاقتى وق اتىلعان. بۇل ەمتيحاننان كەيىنگى ۋاقىتقا سايكەس كەلگەن. بۇل ۋاقىتتا كوپتەگەن وقۋشىلار ۇيلەرىنە تاراعان. ال مەكتەپتە قالعاندارعا سىنىپتاردا جاسىرىنۋعا تۋرا كەلگەن.
ەرەبرۋداعى مۋنيتسيپالدى ءبىلىم بەرۋ ورتالىعى جيىرمادان اسقان ادامداردى وقىتۋمەن اينالىسقان. مۇندا شەتەلدىكتەرگە ارنالعان ينتەگراتسيالىق باعدارلامالار مەن مۇمكىندىگى شەكتەۋلى ادامدارعا ارنالعان كۋرستار ۇسىنىلعان.
باسقا ماتەريالدار
Adyrna.kz ۇلتتىق پورتالىنىڭ ماڭىزدى اقپاراتتارىنا جازىلۋ
سوڭعى جاڭالىقتار تۋرالى حاباردار بولىڭىز