پرەزيدەنت قاسىم-جومارت توقاەۆ 2022 جىلى حالىققا ارناعان جولداۋىندا ساپالى ءبىلىم الۋ ءۇشىن زاماناۋي جاعدايلار جاساۋعا باعىتتالعان «جايلى مەكتەپ» باعدارلاماسى تۋرالى باستاما كوتەردى. اباي وبلىسىندا 2025 جىلدىڭ سوڭىنا دەيىن 2700 وقۋشىعا ارنالعان ءتورت جاڭا مەكتەپ اشىلادى. سونىمەن قاتار، بيىل تاعى ءبىر مەكتەپتىڭ قۇرىلىسىن باستاۋ جوسپارلانۋدا.
«جايلى مەكتەپ» جوباسى - تۇرعىلىقتى جەرىنە قاراماستان ەلىمىزدىڭ بارلىق بالالارى ءۇشىن تەڭ مۇمكىندىكتەردى قامتاماسىز ەتۋگە باعىتتالعان. جاڭا مەكتەپتەردە تەك تەحنيكالىق جابدىقتاۋعا عانا ەمەس، وقۋشىلاردىڭ شىعارماشىلىق جانە ينتەللەكتۋالدىق قابىلەتتەرىن دامىتۋعا ىقپال ەتەتىن ورتا قۇرۋعا دا باسا نازار اۋدارىلادى. ەرەكشە ءبىلىم بەرۋ قاجەتتىلىكتەرى بار بالالار ءۇشىن جەكە سانيتارلىق بولمەلەرى بار كەڭ كابينەتتەر قاراستىرىلعان. جەدەلساتىلار، پاندۋستار جانە ارنايى باعىتتاۋشى بەلگىلەر ورناتىلعان. ءار مەكتەپتە پسيحولوگ، لوگوپەد جانە دەفەكتولوگتار جۇمىس ىستەيدى. جاڭا مەكتەپتەردىڭ باستى ەرەكشەلىكتەرىنىڭ ءبىرى - جۇمساق جيھازدارمەن، كىتاپتارمەن، مۋزىكالىق اسپاپتارمەن جانە ۇستەل ويىندارىمەن جابدىقتالعان وقۋشىلار مەن وقىتۋشىلار ءۇشىن دەمالىس ورىندارىنىڭ بولۋى. سونىمەن قاتار، ءبىلىم بەرۋ مەكەمەلەرى بالالاردىڭ قاۋىپسىزدىگىنە كەپىلدىك بەرەتىن زاماناۋي بەينەباقىلاۋ جۇيەلەرىمەن جابدىقتالعان.
2024 جىلى سەمەيدە 1200 ورىندىق ءىت-مەكتەپ-ليتسەيى سالىندى. بۇل قالاداعى وقۋشى ورنى تاپشىلىعىن ەداۋىر قىسقارتۋعا مۇمكىندىك بەردى. مەكتەپ زاماناۋي ءبىلىم بەرۋ ستاندارتتارىنا سايكەس كەلەدى جانە جاڭا تەحنولوگيالارمەن جابدىقتالعان. ءۇش قاباتتى عيماراتتا فيزيكا، حيميا، بيولوگيا، ينفورماتيكا كابينەتتەرى، مۋلتيمەديالىق سىنىپتار، گرافيكا جانە مودەلدەۋ كابينەتى، سونداي-اق زەرتحانالار، تەلەستۋديا، سمارت-سىنىپتار، 3D-پرينتەرلەر مەن روبوتوتەحنيكا كابينەتتەرى قاراستىرىلعان. مەكتەپتە 280 ورىندىق اكت زالى جانە 420 ورىندىق اسحانا بار.
«ءتورت ءبىلىم بەرۋ مەكەمەسى كۇردەلى جوندەۋدەن ءوتىپ، روبوتوتەحنيكا، حيميا، بيولوگيا، فيزيكا جانە STEM-باعىتتارى پاندەرى بويىنشا 56 زاماناۋي پاندىك كابينەتتەرمەن جابدىقتالعان. پەداگوگتاردىڭ بىلىكتىلىگىن ارتتىرۋ دا ماڭىزدى قادام بولدى. 5 300-دەن استام مۇعالىم تەگىن بىلىكتىلىكتى ارتتىرۋ كۋرستارىنان ءوتتى. بۇگىنگى تاڭدا اباي وبلىسىندا ورتا ءبىلىم بەرۋ ۇيىمدارىنىڭ 38% - اۋداندىق جانە اۋىلدىق مەكتەپتەر قۇرايدى. ولاردىڭ 86-سى جاڭعىرتىلعان»، - دەدى وبلىس اكىمىنىڭ ورىنباسارى جاسۇلان سارسەباەۆ.
جوبا قازاقستاندىق وندىرۋشىلەردى قولداۋعا دا ىقپال ەتەدى. جاڭا مەكتەپتەرگە ارنالعان بارلىق جيھازداردى وتاندىق كاسىپورىندار جەتكىزەدى، بۇل ۇلتتىق ەكونوميكانى نىعايتىپ قانا قويماي، جاڭا جۇمىس ورىندارىن اشادى.
ەلىمىزدىڭ بارلىق وڭىرلەرىندە جاڭا ءبىلىم بەرۋ نىساندارىنىڭ قۇرىلىسىنىڭ ارقاسىندا قوسىمشا جۇمىس ورىندارى قۇرىلۋدا. 2024 جىلدان باستاپ جاڭا سالىنعان مەكتەپتەردە (سەمەي قالاسىنىڭ ءىت-مەكتەپ-ليتسەيى) 184 پەداگوگ جۇمىسپەن قامتاماسىز ەتىلدى.
