Prezident Qasym-Jomart Toqaev 2022 jyly halyqqa arnaǧan Joldauynda sapaly bılım alu üşın zamanaui jaǧdailar jasauǧa baǧyttalǧan «Jaily mektep» baǧdarlamasy turaly bastama köterdı. Abai oblysynda 2025 jyldyŋ soŋyna deiın 2700 oquşyǧa arnalǧan tört jaŋa mektep aşylady. Sonymen qatar, biyl taǧy bır mekteptıŋ qūrylysyn bastau josparlanuda.
«Jaily mektep» jobasy - tūrǧylyqty jerıne qaramastan elımızdıŋ barlyq balalary üşın teŋ mümkındıkterdı qamtamasyz etuge baǧyttalǧan. Jaŋa mektepterde tek tehnikalyq jabdyqtauǧa ǧana emes, oquşylardyŋ şyǧarmaşylyq jäne intellektualdyq qabıletterın damytuǧa yqpal etetın orta qūruǧa da basa nazar audarylady. Erekşe bılım beru qajettılıkterı bar balalar üşın jeke sanitarlyq bölmelerı bar keŋ kabinetter qarastyrylǧan. Jedelsatylar, pandustar jäne arnaiy baǧyttauşy belgıler ornatylǧan. Är mektepte psiholog, logoped jäne defektologtar jūmys ısteidı. Jaŋa mektepterdıŋ basty erekşelıkterınıŋ bırı - jūmsaq jihazdarmen, kıtaptarmen, muzykalyq aspaptarmen jäne üstel oiyndarymen jabdyqtalǧan oquşylar men oqytuşylar üşın demalys oryndarynyŋ boluy. Sonymen qatar, bılım beru mekemelerı balalardyŋ qauıpsızdıgıne kepıldık beretın zamanaui beinebaqylau jüielerımen jabdyqtalǧan.
2024 jyly Semeide 1200 oryndyq IT-mektep-liseiı salyndy. Būl qaladaǧy oquşy orny tapşylyǧyn edäuır qysqartuǧa mümkındık berdı. Mektep zamanaui bılım beru standarttaryna säikes keledı jäne jaŋa tehnologiialarmen jabdyqtalǧan. Üş qabatty ǧimaratta fizika, himiia, biologiia, informatika kabinetterı, multimediialyq synyptar, grafika jäne modeldeu kabinetı, sondai-aq zerthanalar, telestudiia, smart-synyptar, 3D-printerler men robototehnika kabinetterı qarastyrylǧan. Mektepte 280 oryndyq akt zaly jäne 420 oryndyq ashana bar.
«Tört bılım beru mekemesı kürdelı jöndeuden ötıp, robototehnika, himiia, biologiia, fizika jäne STEM-baǧyttary pänderı boiynşa 56 zamanaui pändık kabinettermen jabdyqtalǧan. Pedagogtardyŋ bılıktılıgın arttyru da maŋyzdy qadam boldy. 5 300-den astam mūǧalım tegın bılıktılıktı arttyru kurstarynan öttı. Bügıngı taŋda Abai oblysynda orta bılım beru ūiymdarynyŋ 38% - audandyq jäne auyldyq mektepter qūraidy. Olardyŋ 86-sy jaŋǧyrtylǧan», - dedı oblys äkımınıŋ orynbasary Jasūlan Särsebaev.
Joba qazaqstandyq öndıruşılerdı qoldauǧa da yqpal etedı. Jaŋa mektepterge arnalǧan barlyq jihazdardy otandyq käsıporyndar jetkızedı, būl ūlttyq ekonomikany nyǧaityp qana qoimai, jaŋa jūmys oryndaryn aşady.
Elımızdıŋ barlyq öŋırlerınde jaŋa bılım beru nysandarynyŋ qūrylysynyŋ arqasynda qosymşa jūmys oryndary qūryluda. 2024 jyldan bastap jaŋa salynǧan mektepterde (Semei qalasynyŋ IT-mektep-liseiı) 184 pedagog jūmyspen qamtamasyz etıldı.
