اباي وبلىسىندا قازاق جىلقىسىنىڭ جاڭا تۇقىمى شىعارىلماق. بۇل تۋرالى جۋرناليست وڭعار قابدەن ايتتى، دەپ حابارلايدى «ادىرنا» ءتىلشىسى.
«اقسۋاتتىقتار ءبىر تاماشا ءىستى قولعا الىپتى. جەرگىلىكتى ازاماتتار قارابايىر تۇقىمىن اكەلىپ، سەلەكتسيالىق-اسىلداندىرۋ مەن عىلىمي زەرتتەۋ جۇمىستارىن جۇرگىزىپ جاتىر. اينالىسىپ جاتقاندارىنا 2 جىلدىڭ ءجۇزى بولدى. تەرىسى قالىڭ ، تۇياعى جۇمىر، قاز تابان، ەتى مەن ءسۇتى مول، اپتالاعان ىستىققا ءتوزىمدى، دەنە ءبىتىمى كەسەك، ەسىك پەن توردەي دەپ سيپاتتالاتىن بۇل تۇقىمنىڭ ارعى تەگى قازاقتىكى. جەرگىلىكتى جىلقىلار الاسالاۋ، كەۋدەلى، ومىراۋلى، اياقتارى قىسقا، دەنە ءبىتىمى جاعىنان تۇرپايىلاۋ بولىپ كەلەدى. وسى ەكى تۇقىمدى قازىر بۋدانداستىرىپ جاتىر»،— دەدى ول.
جۋرناليست بۇل ءىستى «اقزام» شارۋا قوجالىعىنىڭ باسشىسى، شىعىس قازاقستان وبلىسىنىڭ قۇرمەتتى ازاماتى بادەلحان قامالحانۇلى قولعا الىپ، اسىلداندىرۋ جۇمىسىمەن اينالىسىپ جاتقانىن اتاپ ءوتتى. ال عىلىمي جاعىنان اۋىلشارۋاشىلىعى عىلىمدارىنىڭ كانديتاتى، قازۇازۋ-ءدىڭ پروفەسسورى، دوتسەنت قايرات يسحان جەتەكشىلىك ەتۋدە.
سونداي-اق ول ازىرگە 6 تۇقىمدىق ايعىرعا ءۇيىر ءبولىپ بەرىلگەنىن جەتكىزدى.
«قارابايىر مەن جابىنى بۋدانداستىرىپ، ودان تاۋ مەن دالاعا بىردەي جۇرەتىن، ءمىنىستى، ءتوزىمدى قازانات جاساۋ دا وڭاي ەمەس. بۇل بۇگىن جاساپ، ەرتەڭ ءمىنىپ جۇرە بەرەتىن ماشينا ەمەس قوي. عىلىم ۇزاق ۋاقىتتى تالاپ ەتەدى. الداعى 5-10 جىلدا بۋدانداسقان، قارابايىر مەن جابىنىڭ تۇقىمدارى اقسۋاتتىڭ سايىن دالاسىندا شاڭداتىپ جۇرەر. قازىر بادەلحان قامالحانۇلى مەن قايرات جالەلۇلى ەكى جىل بويى جۇرگىزىلىپ جاتقان جۇمىستى باقىلاپ، بۋدانداسقان قۇلىنداردى باقىلاپ وتىر»،—دەپ ءتۇسىندىردى وڭعار قابدەن.
