Abai oblysynda qazaq jylqysynyŋ jaŋa tūqymy şyǧarylmaq. Būl turaly jurnalist Oŋǧar Qabden aitty, dep habarlaidy «Adyrna» tılşısı.
«Aqsuattyqtar bır tamaşa ıstı qolǧa alypty. Jergılıktı azamattar Qarabaiyr tūqymyn äkelıp, seleksiialyq-asyldandyru men ǧylymi zertteu jūmystaryn jürgızıp jatyr. Ainalysyp jatqandaryna 2 jyldyŋ jüzı boldy. Terısı qalyŋ , tūiaǧy jūmyr, qaz taban, etı men sütı mol, aptalaǧan ystyqqa tözımdı, dene bıtımı kesek, esık pen tördei dep sipattalatyn būl tūqymnyŋ arǧy tegı qazaqtıkı. Jergılıktı jylqylar alasalau, keudelı, omyrauly, aiaqtary qysqa, dene bıtımı jaǧynan tūrpaiylau bolyp keledı. Osy ekı tūqymdy qazır budandastyryp jatyr»,— dedı ol.
Jurnalist būl ıstı «Aqzam» şarua qojalyǧynyŋ basşysy, Şyǧys Qazaqstan oblysynyŋ qūrmettı azamaty Bädelhan Qamalhanūly qolǧa alyp, asyldandyru jūmysymen ainalysyp jatqanyn atap öttı. Al ǧylymi jaǧynan auylşaruaşylyǧy ǧylymdarynyŋ kanditaty, QazŪAZU-dıŋ professory, dosent Qairat İshan jetekşılık etude.
Sondai-aq ol äzırge 6 tūqymdyq aiǧyrǧa üiır bölıp berılgenın jetkızdı.
«Qarabaiyr men jabyny budandastyryp, odan tau men dalaǧa bırdei jüretın, mınıstı, tözımdı qazanat jasau da oŋai emes. Būl bügın jasap, erteŋ mınıp jüre beretın maşina emes qoi. Ǧylym ūzaq uaqytty talap etedı. Aldaǧy 5-10 jylda budandasqan, qarabaiyr men jabynyŋ tūqymdary Aqsuattyŋ saiyn dalasynda şaŋdatyp jürer. Qazır Bädelhan Qamalhanūly men Qairat Jälelūly ekı jyl boiy jürgızılıp jatqan jūmysty baqylap, budandasqan qūlyndardy baqylap otyr»,—dep tüsındırdı Oŋǧar Qabden.
