قازاقستاندا مال باسى تۇرىندە تاۋارلىق نەسيە بەرىلە باستادى. العاش بوپ بۇل نەسيەنى شۋ اۋدانىنىڭ تۇرعىندارى الدى. بۇل تۋرالى جامبلىس وبلىسى اكىمدىگىنىڭ ءباسپاسوز قىزمەتى جازدى،دەپ حابارلايدى «ادىرنا» ءتىلشىسى.
جاڭا باعدارلامانىڭ ماقساتى — اۋىلدىق ەلدى مەكەندەردە مال باسىن كوبەيتۋ. جامبىل وبلىسى اكىمدىگى اۋىل شارۋاشىلىعى باسقارماسى باسشىسىنىڭ ورىنباسارى تولەبەك قۇلەكەەۆتىڭ ايتۋىنشا، نەسيە شارتى بويىنشا اۋىل تۇرعىندارى مال باسىن ودان ءارى ءوسىرۋ ءۇشىن تاۋارلىق نەسيە الادى. از قامتىلعان وتباسىلار مەن جۇمىسسىز ازاماتتاردى قولداۋعا باسىمدىق بەرىلەدى. تاۋارلىق نەسيەسى 5 جىل ىشىندە وتەلۋى كەرەك، ونىڭ ءبىرىنشى جىلى – دەمالىس، ودان كەيىن جىل سايىن – ءتولدىڭ 50 پايىزى نەگىزىندە وتەم تولەۋگە مىندەتتەلەدى. باعدارلامادا اۋىل شارۋاشىلىعى جانۋارلارىن ساقتاندىرۋ شارتى جانە كەپىل كوزدەلگەن، بىراق بۇل تارماقتار مىندەتتى ەمەس، تەك ەكى تاراپتىڭ كەلىسىمىنە سايكەس جۇزەگە اسادى.
تاۋارلىق نەسيەلەۋ باعدارلاماسى اياسىنداعى العاشقى كەلىسىم شۋ اۋدانىندا جاسالدى. «اتاي» شارۋا قوجالىعىنىڭ يەسى ساكەن اتاەۆ اباي اۋىلىنىڭ تۇرعىنى قاليسۇلتان تىلەپبەرگەنوۆكە 50 باس (قۇنى - 3 ملن. تەڭگە), اۋىل ازاماتى باقىتجان بوتاەۆقا 3 ملن. تەڭگەگە 50 باس قوي تۇقىمىن بەردى.
— جاڭا باعدارلاما تۇرعىنداردىڭ ءال-اۋقاتىن جاقسارتۋعا جاقسى مۇمكىندىك بەرەدى دەپ ەسەپتەيمىن. اۋىلداستارىمدى قولداپ، ەلىمىزدىڭ دامۋىنا ۇلەس قوسۋعا ءازىرمىن. الداعى ۋاقىتتا اسىل تۇقىمدى مالدى دا بەرۋ ويىمدا بار، — دەدى ساكەن اتاەۆ.
قاليسۇلتان تىلەپبەرگەنوۆ تاۋارلىق نەسيەلەۋ تەتىگىن ءتيىمدى پايدالانىپ، اۋىلدىق اعايىنعا قولداۋ كورسەتپەك. جاڭا باعدارلاما اياسىندا ءوڭىردىڭ بارلىق اۋداندارىندا ءتۇسىندىرۋ جۇمىستارى جۇرگىزىلىپ جاتىر. مويىنقۇم اۋدانىندا «ۇركەر» شارۋا قوجالىعى 20 باس ءىرى قارا مەن 100 باس ۋاق مال بەرۋگە دايىن. قازىر بەلسەندى اۋىل تۇرعىندارىنىڭ ءتىزىمى جيناقتالىپ جاتىر. تاۋارلىق نەسيەلەندىرۋ باعدارلاماسى اياسىندا جىل سوڭىنا دەيىن 80-گە جۋىق كەلىسىمگە قول قويۋ جوسپارلانىپ وتىر.
ەسكە سالايىق، بۇعان دەيىن پرەزيدەنت قاسىم-جومارت توقاەۆ ءوز جولداۋىندا اۋىل شارۋاشىلىعى سالاسىنا جاڭا قۇرال – «تاۋارلىق نەسيەنى» ەنگىزۋ ماسەلەسىن قاراستىرۋدى تاپسىرعان بولاتىن.
