قر ىشكى ىستەر مينيسترلىگىنىڭ "سۇڭقار" ارنايى جاساعى بىرىككەن اراب امىرلىكتەرىندە (دۋباي) وتكەن SWAT Challenge حالىقارالىق جارىسىندا باس جۇلدەنى يەلەندى. قازاقستاندىق جاساق ەڭ جوعارى ناتيجە كورسەتىپ، جالپىكوماندالىق ەسەپتە ءبىرىنشى ورىنعا شىقتى.
سونىمەن قاتار، قازاقستاندىق باسقا ارنايى جاساقتار – "ارىستان", "ساردار" جانە "ارلان" دا ۇزدىك ناتيجە كورسەتىپ، جارىستىڭ توپ-10 قاتارىنا ەندى. "سۇڭقار" ارنايى جاساعى جارىستىڭ ءبىرىنشى كەزەڭىن 1 مينۋت 34 سەكۋندتا اياقتادى. وسى ۋاقىت ىشىندە ولار كەدەرگىلەردەن ءوتىپ، نىسانالاردى ءدال كوزدەپ، شارتتى تۇتقىنداردى بوساتتى. بۇل كورسەتكىشكە تەك قىتايلىق كوماندالار جاقىنداي الدى، بىراق ايىرماشىلىق وتە از بولدى.
قر ءىىم ۇلتتىق ۇلان باس قولباسشىسىنىڭ ورىنباسارى انساعان بالتابەكوۆ ارنايى جاساقتاردىڭ بۇل جەتىستىگى مەملەكەت باسشىسى مەن ۇكىمەتتىڭ قولداۋىنىڭ ارقاسىندا مۇمكىن بولعانىن اتاپ ءوتتى. ونىڭ ايتۋىنشا، ارنايى جاساقتار ۇزدىك جابدىقتارمەن، قارۋ-جاراقپەن قامتاماسىز ەتىلگەن جانە لاڭكەستىككە قارسى وپەراتسيالاردى ءساتتى ورىنداۋ ءۇشىن كۇشەيتىلگەن دايىندىقتان وتەدى.
بيىلعى جىلى قازاقستاننان العاش رەت ايەلدەر قۇراماسى – "توميريس" جارىسقا قاتىسىپ وتىر. بۇل كومانداعا ەلىمىزدىڭ ءار وڭىرىنەن ەڭ ۇزدىك ارنايى جاساق جاۋىنگەرلەرى ىرىكتەلگەن.
"كوماندا اتاۋىن ءوزىمىز تاڭدادىق. سەبەبى توميريس – جاۋىنگەر قىز. ءبىز وسىلايشا قازاقستاندىق ايەلدەردىڭ نەگە قابىلەتتى ەكەنىن كورسەتكىمىز كەلدى", – دەيدى كوماندا كاپيتانى ايناعۇل بايجىگىتوۆا.
SWAT Challenge حالىقارالىق جارىسىنا 80-نەن استام ەلدەن 106 كوماندا قاتىسۋدا. قازاقستان بۇل بايقاۋعا 12 ارنايى بولىمشەمەن قاتىسىپ وتىر. ولاردىڭ قاتارىندا ۇلتتىق قاۋىپسىزدىك كوميتەتى، مەملەكەتتىك كۇزەت قىزمەتى جانە ايماقتىق پوليتسيا دەپارتامەنتتەرى بار. جارىس ءالى ءتورت كۇن بويى جالعاسادى.
