QR Ishki ister mınıstrliginiń "Suńqar" arnaıy jasaǵy Birikken Arab Ámirlikterinde (Dýbaı) ótken SWAT Challenge halyqaralyq jarysynda bas júldeni ıelendi. Qazaqstandyq jasaq eń joǵary nátıje kórsetip, jalpykomandalyq esepte birinshi orynǵa shyqty.
Sonymen qatar, qazaqstandyq basqa arnaıy jasaqtar – "Arystan", "Sardar" jáne "Arlan" da úzdik nátıje kórsetip, jarystyń TOP-10 qataryna endi. "Suńqar" arnaıy jasaǵy jarystyń birinshi kezeńin 1 mınýt 34 sekýndta aıaqtady. Osy ýaqyt ishinde olar kedergilerden ótip, nysanalardy dál kózdep, shartty tutqyndardy bosatty. Bul kórsetkishke tek qytaılyq komandalar jaqyndaı aldy, biraq aıyrmashylyq óte az boldy.
QR IIM Ulttyq ulan Bas qolbasshysynyń orynbasary Ánsaǵan Baltabekov arnaıy jasaqtardyń bul jetistigi memleket basshysy men úkimettiń qoldaýynyń arqasynda múmkin bolǵanyn atap ótti. Onyń aıtýynsha, arnaıy jasaqtar úzdik jabdyqtarmen, qarý-jaraqpen qamtamasyz etilgen jáne lańkestikke qarsy operaııalardy sátti oryndaý úshin kúsheıtilgen daıyndyqtan ótedi.
Bıylǵy jyly Qazaqstannan alǵash ret áıelder quramasy – "Tomırıs" jarysqa qatysyp otyr. Bul komandaǵa elimizdiń ár óńirinen eń úzdik arnaıy jasaq jaýyngerleri iriktelgen.
"Komanda ataýyn ózimiz tańdadyq. Sebebi Tomırıs – jaýynger qyz. Biz osylaısha qazaqstandyq áıelderdiń nege qabiletti ekenin kórsetkimiz keldi", – deıdi komanda kapıtany Aınaǵúl Baıjigitova.
SWAT Challenge halyqaralyq jarysyna 80-nen astam elden 106 komanda qatysýda. Qazaqstan bul baıqaýǵa 12 arnaıy bólimshemen qatysyp otyr. Olardyń qatarynda Ulttyq qaýipsizdik komıteti, Memlekettik kúzet qyzmeti jáne aımaqtyq polıııa departamentteri bar. Jarys áli tórt kún boıy jalǵasady.
