ادام اعزاسىنا قاجەتتى ۆيتاميندەر مەن باد ونىمدەرىن وندىرەتىن كومپانيادا جۇمىس ىستەيتىن كەيبىر قىزمەتكەرلەر باسشىلىق تاراپىنان دورەكىلىككە تاپ بولعانىن مالىمدەدى. ولاردىڭ ايتۋىنشا، ديرەكتور قىزمەتىن اتقاراتىن داۋرەن ەسىمدى ازامات قىزمەتكەرلەرگە بوعاۋىز سوزدەر ايتىپ، دورەكى قارىم-قاتىناس جاساعان.
رەداكتسياعا كەلىپ تۇسكەن اقپارات اياسىندا كومپانيادا بۇرىن جۇمىس ىستەگەن ازاماتتاردان جاۋاپ الىپ، ماسەلەنىڭ اق-قاراسىن انىقتاۋعا تىرىستىق. كەلەڭسىز جاعداي ورىن العان كومپانيادا ەكى اي جۇمىس ىستەگەن بۇرىنعى ساتۋ مامانى پىكىر ءبىلدىردى.
"مەنىڭ ويىمشا، ول كىسى سول ساتتە اشۋلى بولدى. سەبەبى ساتۋ ماماندارى جۇمىسقا كەشىگىپ كەلدى. وسى جاعدايدان سوڭ باسشىلىقپەن جالپى جينالىس بولدى. داۋرەن مىرزا مەنىڭ جەكەمە وتەتىن ءسوز ايتپادى. جينالىس بارىسىندا جۇمىس بويىنشا كوماندامىزدىڭ اتىنان ءسوز سويلەدىك. جاعدايدى ايتتىق. كەيىن ءبىز كوماندامەن بىرگە ول كومپانيادان جۇمىستان شىعىپ كەتتىك", – دەيدى بۇرىنعى ساتۋ مامانى.
"بۇل قالىپتى جۇمىس پروتسەسى مە، الدە باسشىنىڭ بيلىكتى اسىرا پايدالانۋى ما؟"
تاعى ءبىر ساتۋ مامانى داۋرەن ەسىمدى ازاماتتىڭ قىزمەتكەرلەرمەن دورەكى سويلەسەتىنىن راستادى.
«ول كىسىنىڭ جۇمىس ىستەۋ ءپرينتسيپى سونداي. سوعان بايلانىستى دا كوپ ادامدار جۇمىستان شىعىپ كەتتىك. جينالىستاردا، تاڭعى بەس مينۋتتىق جينالىستاردا بوقتىق، دورەكى سوزدەردى كوپ قولدانادى. "سەندەر سوندايسىڭدار" دەپ تە، جەكە دە ايتىلادى. باسشىلىق تاراپىنا دا ەسكەرتتىك. داۋرەن مىرزا كۇندەلىكتى بوعاۋىز سوزدەردى قولداناتىن. وسىعان دەيىن قانشاما باسشىلار، ادامدار بولدى. بىراق مۇنداي قارىم-قاتىناستى ءبىز كورمەگەنبىز. كوپشىلىگى وسىعان شىداماي جۇمىستان شىعىپ جاتاتىن. ماماندار كوپ اۋىسادى. ول كىسىنىڭ ماقساتى تۇسىنىكسىز. سەبەپ بار بولسىن، جوق بولسىن، سونداي ءسوزدى ايتاتىن. ومىردە، جالپى جينالىستا، ۆاتساپتا، كۇندەلىكتى قارىم-قاتىناستا دا سولاي سويلەيتىن. وسىعان دەيىن تاجىريبەمدە مۇنداي بولعان ەمەس. ول كىسىنىڭ جەكەسىنە دە ايتتىم. "ماعان ولاي سويلەۋگە قارسىمىن، ارتىق كەتپەڭىز" دەپ ايتاتىنبىز. ءتىپتى ۋادە دە بەرگەن. ۋادەسىندە تۇرمادى. نەگىزى جۇمىس كەستەسى باستاپقىدا 7-گە دەيىن دەپ ايتىلاتىن. بىراق 20-21-22:00-گە دەيىن قالاتىن كەزدەر بولدى. "قالاسىڭدار، قالماساڭدار ەرتەڭ كەلمەي-اق قويىڭدار" دەيتىن. جالاقىنى ۇلكەن باسشىلىق تولەيتىن. ول جاعىنان ەشقانداي ماسەلە بولمايتىن". كەيىن جۇمىستان شىىعپ كەتتىك. داۋرەن ماجبۇرلەدى. ۇنەمى سولاي سويلەيتىن»، – دەيدى ساتۋ مامانى.
"كوماندامەن جينالىس جاساپ، شەشىم قابىلدادىق"
كومپانيانىڭ "ۇلكەن" باسشىلىعى ورىن العان جاعدايعا قاتىستى تۇسىنىكتەمە بەردى. ونىڭ سوزىنشە، جاعداي 2024 جىلدىڭ جەلتوقسان ايىندا بولعان. الايدا ءوزىن كومپانيانىڭ قۇرىلتايشىسى دەپ تانىستىرعان ايەل ادام بۇل جاعدايدى جاقىندا عانا بىلگەنىن حابارلادى.
"مۇنداي جاعداي بولادى دەپ ەشبىر باسشى ويلامايدى دەگەن ويدامىن. 2014 جىلدان باستاپ بيزنەسكە كەلدىك. مەن كاسىپكەرمىن، ۆيتامين، باد ءوندىرۋشىسىمىن. شتاتتىق كولەم ۇلكەن دەپ ايتا المايمىن. بىراق، ءبىراز ادامداردى جۇمىسپەن قامتاماسىز ەتىپ جاتىرمىز. مۇنداي جاعداي ومىرىمدە بولماعان، العاش رەت كەلەڭسىز جاعدايمەن كەزدەسىپ تۇرمىز. مەنى كاسىپكەرلەر جاقسى تۇسىنەدى دەگەن ويدامىن. بۇل جاعدايدى ەستي سالا، ارينە، ءبىرىنشى كەزەكتە داۋرەن مىرزامەن سويلەستىك. بۇكىل كوماندامەن بىرگە جينالىس جاسادىق. ول كىسىگە قاتاڭ سوگىس جاريالاندى جانە دەدلاين بەرىلدى. سونىمەن قوسا، كوماندامەن دە سۇحبات جۇرگىزىلدى. ايتا كەتۋ كەرەك، داۋرەن مىرزانى قولداپ جاتقان كوماندا مۇشەلەرى وتە كوپ. كاسىپكەر بولعان سوڭ ساتۋ جوسپارىن ورىنداۋ، وزگە دە جۇمىستار بار. مۇمكىن پروۆوكاتسيا، مۇمكىن قانداي دا ءبىر ىشكى جاعدايلار، ۇرىس-كەرىس بولعان شىعار. ەكى تاراپتى دا تىڭدادىق. ازىرگە بىزدە داۋرەن مىرزا جۇمىس ىستەپ جاتىر. قالاساڭىزدار كومپانيامىزعا كەلىپ، كوزبە-كوز كورىڭىزدەر", – دەپ مالىمدەدى كومپانيا باسشىلىعى.
WhatsApp-تاعى داۋلى حابارلامالار
قىزمەتكەرلەر رەداكتسياعا WhatsApp-تاعى حابارلامالاردىڭ سكرينشوتتارىن دا ۇسىندى. ولاردىڭ ايتۋىنشا، توپتىق چاتتاردا دا داۋرەن مىرزا قىزمەتكەرلەرمەن دورەكى سويلەسكەن.
2011 جىلى نەگىزى قۇرىلعان كومپانيا الەۋمەتتىك جەلىلەردە بەلسەندى جۇمىس ىستەيدى. ولاردىڭ Instagram پاراقشاسىندا بىرنەشە پاراقشالارى اشىلعان. ال رەسمي ءارى نەگىزگى پاپاقشادا 8000-نان استام وقىرمان بار. بىراق، بۇرىنعى قىزمەتكەرلەر سىرتقى يميدج بەن ىشكى جاعداي ەكى ءتۇرلى ەكەنىن ايتادى.
كومپانياعا تۇتىنۋشى رەتىندە حابارلاسىپ، ءونىمنىڭ باعاسى ءار ادامعا ارنايى ەسەپتەلەتىنىن انىقتادىق. ال بالالار دارۋمەنىن 3 ايلىق بالادان 16 جاسقا دەيىنگى جاسوسپىرىمگە ىشۋگە بولاتىنى دا جەلىدەگى پاراقشادا كورسەتىلگەن.
“سالەمەتسىز بە! “…”دەنساۋلىق ورتالىعىنا قىزىعۋشىلىق بىلدىرگەنىڭىزگە راقمەت!ورتالىق مامانى سىزگە جاقىن ارادا حابارلاسادى”، - دەلىنگەن جاۋاپتا.
زاڭ نە دەيدى؟
قازاقستان رەسپۋبليكاسىنىڭ زاڭناماسىنا سايكەس، جۇمىس بەرۋشىنىڭ قىزمەتكەرلەرگە دورەكىلىك كورسەتۋى، بوعاۋىز سوزدەر ايتۋى جانە قىزمەتتىك وكىلەتتىگىن اسىرا پايدالانۋى تارتىپتىك جاۋاپكەرشىلىككە اكەلۋى مۇمكىن. ەگەر بۇل ارەكەتتەر مورالدىق نەمەسە پسيحولوگيالىق قىسىم كورسەتۋ رەتىندە قاراستىرىلسا، قىزمەتكەرلەر سوتقا نەمەسە ەڭبەك ينسپەكتسياسىنا شاعىم تۇسىرە الادى.
WhatsApp جەلىسىندە كومپانيانىڭ ورتاق توبىندا جازىلعان بالاعات سوزدەر ەتيكاعا ساي ماتەريالدا جاريالانبادى
