Därumen satqyzatyn kompaniia direktory qyzmetkerlerdı balaǧattap, qorlaǧan

Adam aǧzasyna qajettı vitaminder men BAD önımderın öndıretın kompaniiada jūmys ısteitın keibır qyzmetkerler basşylyq tarapynan dörekılıkke tap bolǧanyn mälımdedı. Olardyŋ aituynşa, direktor qyzmetın atqaratyn Däuren esımdı azamat qyzmetkerlerge boǧauyz sözder aityp, dörekı qarym-qatynas jasaǧan. Redaksiiaǧa kelıp tüsken aqparat aiasynda kompaniiada būryn jūmys ıstegen azamattardan jauap alyp, mäselenıŋ aq-qarasyn anyqtauǧa tyrystyq. Keleŋsız jaǧdai oryn alǧan kompaniiada ekı ai jūmys ıstegen būrynǧy satu mamany pıkır bıldırdı. "Menıŋ oiymşa, ol kısı sol sätte aşuly boldy. Sebebı satu mamandary jūmysqa keşıgıp keldı. Osy jaǧdaidan soŋ basşylyqpen jalpy jinalys boldy. Däuren myrza menıŋ jekeme ötetın söz aitpady. Jinalys barysynda jūmys boiynşa komandamyzdyŋ atynan söz söiledık. Jaǧdaidy aittyq. Keiın bız komandamen bırge ol kompaniiadan jūmystan şyǧyp kettık", – deidı būrynǧy satu mamany. "Būl qalypty jūmys prosesı me, älde basşynyŋ bilıktı asyra paidalanuy ma?" Taǧy bır satu mamany Däuren esımdı azamattyŋ qyzmetkerlermen dörekı söilesetının rastady. «Ol kısınıŋ jūmys ısteu prinsipı sondai. Soǧan bailanysty da köp adamdar jūmystan şyǧyp kettık. Jinalystarda, taŋǧy bes minuttyq jinalystarda boqtyq, dörekı sözderdı köp qoldanady. "Sender sondaisyŋdar" dep te, jeke de aitylady. Basşylyq tarapyna da eskerttık. Däuren myrza kündelıktı boǧauyz sözderdı qoldanatyn. Osyǧan deiın qanşama basşylar, adamdar boldy. Bıraq mūndai qarym-qatynasty bız körmegenbız. Köpşılıgı osyǧan şydamai jūmystan şyǧyp jatatyn. Mamandar köp auysady. Ol kısınıŋ maqsaty tüsınıksız. Sebep bar bolsyn, joq bolsyn, sondai sözdı aitatyn. Ömırde, jalpy jinalysta, vatsapta, kündelıktı qarym-qatynasta da solai söileitın. Osyǧan deiın täjıribemde mūndai bolǧan emes. Ol kısınıŋ jekesıne de aittym. "Maǧan olai söileuge qarsymyn, artyq ketpeŋız" dep aitatynbyz. Tıptı uäde de bergen. Uädesınde tūrmady. Negızı jūmys kestesı bastapqyda 7-ge deiın dep aitylatyn. Bıraq 20-21-22:00-ge deiın qalatyn kezder boldy. "Qalasyŋdar, qalmasaŋdar erteŋ kelmei-aq qoiyŋdar" deitın. Jalaqyny ülken basşylyq töleitın. Ol jaǧynan eşqandai mäsele bolmaityn". Keiın jūmystan şyyǧp kettık. Däuren mäjbürledı. Ünemı solai söileitın», – deidı satu mamany. "Komandamen jinalys jasap, şeşım qabyldadyq" Kompaniianyŋ "ülken" basşylyǧy oryn alǧan jaǧdaiǧa qatysty tüsınıkteme berdı. Onyŋ sözınşe, jaǧdai 2024 jyldyŋ jeltoqsan aiynda bolǧan. Alaida özın kompaniianyŋ qūryltaişysy dep tanystyrǧan äiel adam būl jaǧdaidy jaqynda ǧana bılgenın habarlady. "Mūndai jaǧdai bolady dep eşbır basşy oilamaidy degen oidamyn. 2014 jyldan bastap bizneske keldık. Men käsıpkermın, vitamin, BAD öndıruşısımın. Ştattyq kölem ülken dep aita almaimyn. Bıraq, bıraz adamdardy jūmyspen qamtamasyz etıp jatyrmyz. Mūndai jaǧdai ömırımde bolmaǧan, alǧaş ret keleŋsız jaǧdaimen kezdesıp tūrmyz. Menı käsıpkerler jaqsy tüsınedı degen oidamyn. Būl jaǧdaidy esti sala, ärine, bırınşı kezekte Däuren myrzamen söilestık. Bükıl komandamen bırge jinalys jasadyq. Ol kısıge qataŋ sögıs jariialandy jäne dedlain berıldı. Sonymen qosa, komandamen de sūhbat jürgızıldı. Aita ketu kerek, Däuren myrzany qoldap jatqan komanda müşelerı öte köp. Käsıpker bolǧan soŋ satu josparyn oryndau, özge de jūmystar bar. Mümkın provokasiia, mümkın qandai da bır ışkı jaǧdailar, ūrys-kerıs bolǧan şyǧar. Ekı tarapty da tyŋdadyq. Äzırge bızde Däuren myrza jūmys ıstep jatyr. Qalasaŋyzdar kompaniiamyzǧa kelıp, közbe-köz körıŋızder", – dep mälımdedı kompaniia basşylyǧy. WhatsApp-taǧy dauly habarlamalar Qyzmetkerler redaksiiaǧa WhatsApp-taǧy habarlamalardyŋ skrinşottaryn da ūsyndy. Olardyŋ aituynşa, toptyq chattarda da Däuren myrza qyzmetkerlermen dörekı söilesken. 2011 jyly negızı qūrylǧan kompaniia äleumettık jelılerde belsendı jūmys ısteidı. Olardyŋ Instagram paraqşasynda bırneşe paraqşalary aşylǧan. Al resmi ärı negızgı papaqşada 8000-nan astam oqyrman bar. Bıraq, būrynǧy qyzmetkerler syrtqy imidj ben ışkı jaǧdai ekı türlı ekenın aitady. Kompaniiaǧa tūtynuşy retınde habarlasyp, önımnıŋ baǧasy är adamǧa arnaiy esepteletının anyqtadyq. Al balalar därumenın 3 ailyq baladan 16 jasqa deiıngı jasöspırımge ışuge bolatyny da jelıdegı paraqşada körsetılgen. “Sälemetsız be! “…”densaulyq ortalyǧyna qyzyǧuşylyq bıldırgenıŋızge raqmet!Ortalyq mamany sızge jaqyn arada habarlasady”, - delıngen jauapta. Zaŋ ne deidı? Qazaqstan Respublikasynyŋ zaŋnamasyna säikes, jūmys beruşınıŋ qyzmetkerlerge dörekılık körsetuı, boǧauyz sözder aituy jäne qyzmettık ökılettıgın asyra paidalanuy tärtıptık jauapkerşılıkke äkeluı mümkın. Eger būl äreketter moraldyq nemese psihologiialyq qysym körsetu retınde qarastyrylsa, qyzmetkerler sotqa nemese eŋbek inspeksiiasyna şaǧym tüsıre alady. WhatsApp jelısınde kompaniianyŋ ortaq tobynda jazylǧan balaǧat sözder etikaǧa sai materialda jariialanbady