ۋكراينا پرەزيدەنتى ۆلاديمير زەلەنسكي اقش-تىڭ پرەزيدەنتى دونالد ترامپپەن كەزدەسۋ ماسكەۋمەن بەلگىلى ءبىر فورماتتا ديالوگ باستاۋ ءۇشىن ماڭىزدى شارت ەكەنىن مالىمدەدى، دەپ حابارلايدى "ادىرنا" ۇلتتىق پورتالى Associated Press اگەنتتىگىنە سىلتەمە جاساپ.
"مەنىڭ ويىمشا، ەڭ الدىمەن ءبىز ترامپپەن كەزدەسۋ وتكىزۋىمىز كەرەك، بۇل وتە ماڭىزدى. ايتا كەتەيىن، مۇنى بۇكىل ەۋروپا قالايدى", – دەدى زەلەنسكي.
ونىڭ ايتۋىنشا، اقش باسشىسىمەن بايلانىس ورناتقاننان كەيىن رەسەيمەن قانداي دا ءبىر كەلىسسوز فورماتىنا كوشۋ كەرەك. زەلەنسكي كەلىسسوزدەر ۇستەلىندە ۋكراينا، رەسەي، اقش جانە ەۋروپالىق وداقتىڭ وكىلدەرى بولۋى ءتيىس دەپ سانايدى.
سونداي-اق، زەلەنسكي ۋكراينانىڭ ناتو-عا كىرۋى قاجەتتىگىن تاعى دا العا تارتتى.
"مەن شىنىمەن دە بۇل – ۋكراينانىڭ قاۋىپسىزدىك كەپىلدىكتەرىن الۋدىڭ ەڭ ارزان جولى دەپ سانايمىن. بۇل بارلىعىنا ءتيىمدى", – دەپ ءتۇسىندىردى ول.
ونىڭ ايتۋىنشا، كيەۆتىڭ اليانسقا قوسىلۋى ترامپ ءۇشىن ۇلكەن جەڭىس بولار ەدى. ويتكەنى بۇل شەشىمدى اقش قابىلدايتىنىن، ال رەسەيدىڭ بۇعان ىقپالى جوق ەكەنىن كورسەتەدى. سونىمەن قاتار، ناتو-عا ۋكراينانىڭ 800 مىڭ ساربازدان تۇراتىن اسكەرى قوسىلادى.
ەگەر ۋكرايناعا باسقا قاۋىپسىزدىك كەپىلدىكتەرى ۇسىنىلسا، وندا ول اقش پەن ەۋروپادان قاجەتتى كولەمدە قارۋ الۋى كەرەك جانە ءوز قورعانىس ونەركاسىبىن قولداۋ ماڭىزدى، دەپ اتاپ ءوتتى زەلەنسكي.
بۇعان دەيىن ترامپ رەسەي پرەزيدەنتى ۆلاديمير پۋتينمەن بايلانىس ورناتۋعا، سونىڭ ىشىندە كەزدەسۋگە دايىن ەكەنىن بىرنەشە رەت مالىمدەگەن. پۋتين دە وسىنداي نيەتىن بىلدىرگەن. الايدا ەكى ەل باسشىلارىنىڭ ناقتى كەلىسسوزدەر جۇرگىزەتىنى نەمەسە تەلەفون ارقىلى سويلەسەتىنى جايلى رەسمي اقپارات جوق.
بۇعان دەيىن پۋتين زەلەنسكيدى "زاڭسىز پرەزيدەنت" دەپ اتاعان ەدى. ويتكەنى 2024 جىلدىڭ مامىر ايىندا ونىڭ پرەزيدەنتتىك وكىلەتتىك مەرزىمى اياقتالدى. سوندىقتان ول بەيبىت كەلىسىمگە قول قويۋ قۇقىعىنا يە ەمەس دەپ سانايدى.
