توقاەۆ ۇلتتىق باسىلىم كۇنىمەن قۇتتىقتادى

بۇگىن – ۇلتتىق باسىلىم كۇنى. 2023 جىلى اقپارات جانە قوعامدىق دامۋ مينيسترلىگى 1913 جىلدىڭ 2 اقپانىندا العاش رەت شىققان “قازاق” گازەتىنىڭ 110 جىلدىعىنا وراي  دال وسى كۇندى اتاۋلى داتا رەتىندە بەكىتكەن ەدى. ەكىنشى رەت اتاپ ءوتىلىپ جاتقان مەرەكەمەن مەملەكەت باسشىسى قاسىم-جومارت توقاەۆ قۇتتىقتادى. "قادىرلى ءباسپاسوز قىزمەتكەرلەرى! سىزدەردى ۇلتتىق باسىلىم كۇنىمەن قۇتتىقتايمىن! بۇل مەرەكە – ەلىمىزدى وركەندەتۋ جانە مەملەكەتتىگىمىزدى نىعايتۋ جولىندا ەڭبەك ەتىپ جۇرگەن ءباسپاسوز وكىلدەرىنە دەگەن شىنايى قۇرمەتتىڭ بەلگىسى.قازاق باسىلىمدارى ءاردايىم حالىقتىڭ ءۇنى، ءتول رۋحانياتىمىزدىڭ بەرىك قورعانى سانالعان. ءبىز ونىڭ باي تاريحىن، اعارتۋشىلىق ءداستۇرىن ماقتان تۇتامىز. گازەت-جۋرنالدارىمىز ۇلتتىق سانا-سەزىمدى دامىتۋ ىسىندە ايرىقشا ءرول اتقارادى. زيالى قاۋىم وكىلدەرى قوعامداعى كوكەيكەستى ماسەلەلەرگە قاتىستى وي-پىكىرىن، نەگىزىنەن، مەرزىمدى ءباسپاسوز ارقىلى بىلدىرەدى" ،- دەدى پرەزيدەنت. قاسىم-جومارت توقاەۆ ەلىمىزدە ءار كەزەڭدە جارىق كورگەن باسىلىمدار ۇلت مۇددەسىنە ادال قىزمەت ەتىپ كەلگەنىن اتاپ ءوتتى. مەملەكەت باسشىسىنىڭ ايتۋىنشا، اعا بۋىن جۋرناليستەر قالىپتاستىرعان ءداستۇردى بۇگىنگى كاسىبي جۋرناليستەر لايىقتى جالعاستىرىپ، شىنايى اقپارات تاراتۋ مەن جالپىۇلتتىق قۇندىلىقتاردى ناسيحاتتاۋعا بەلسەنە اتسالىسىپ ءجۇر. سونداي-اق، پرەزيدەنت گازەت-جۋرنالدار الداعى ۋاقىتتا دا جاسامپاز باستامالاردى جۇزەگە اسىرۋعا، ۇلتتىڭ جاڭا ساپاسىن قالىپتاستىرۋعا جانە ەل بىرلىگىن نىعايتۋعا زور ۇلەس قوساتىنىنا سەنىم ءبىلدىردى.