Toqaev Ūlttyq basylym künımen qūttyqtady

Bügın – Ūlttyq basylym künı. 2023 jyly aqparat jäne qoǧamdyq damu ministrlıgı 1913 jyldyŋ 2 aqpanynda alǧaş ret şyqqan “Qazaq” gazetınıŋ 110 jyldyǧyna orai  däl osy kündı atauly data retınde bekıtken edı. Ekınşı ret atap ötılıp jatqan merekemen Memleket basşysy Qasym-Jomart Toqaev qūttyqtady. "Qadırlı baspasöz qyzmetkerlerı! Sızderdı Ūlttyq basylym künımen qūttyqtaimyn! Būl mereke – elımızdı örkendetu jäne memlekettıgımızdı nyǧaitu jolynda eŋbek etıp jürgen baspasöz ökılderıne degen şynaiy qūrmettıŋ belgısı.Qazaq basylymdary ärdaiym halyqtyŋ ünı, töl ruhaniiatymyzdyŋ berık qorǧany sanalǧan. Bız onyŋ bai tarihyn, aǧartuşylyq dästürın maqtan tūtamyz. Gazet-jurnaldarymyz ūlttyq sana-sezımdı damytu ısınde airyqşa röl atqarady. Ziialy qauym ökılderı qoǧamdaǧy kökeikestı mäselelerge qatysty oi-pıkırın, negızınen, merzımdı baspasöz arqyly bıldıredı" ,- dedı Prezident. Qasym-Jomart Toqaev elımızde är kezeŋde jaryq körgen basylymdar ūlt müddesıne adal qyzmet etıp kelgenın atap öttı. Memleket basşysynyŋ aituynşa, aǧa buyn jurnalister qalyptastyrǧan dästürdı bügıngı käsıbi jurnalister laiyqty jalǧastyryp, şynaiy aqparat taratu men jalpyūlttyq qūndylyqtardy nasihattauǧa belsene atsalysyp jür. Sondai-aq, Prezident gazet-jurnaldar aldaǧy uaqytta da jasampaz bastamalardy jüzege asyruǧa, ūlttyŋ jaŋa sapasyn qalyptastyruǧa jäne el bırlıgın nyǧaituǧa zor üles qosatynyna senım bıldırdı.