جەزقازعاندا «قازاقمىس كورپوراتسياسى» جشس قولداۋىمەن ايگىلى شاحماتشى، الەمنىڭ بەس دۇركىن چەمپيونى جانسايا ابدۋمالىكتىڭ شاحمات اكادەمياسىنىڭ جاڭا فيليالى اشىلدى.
قازاقستان رەسپۋبليكاسىنىڭ تۋريزم جانە سپورت ءمينيسترى ەربول مىرزابوسىنوۆ ارنايى كەلىپ، اكادەميانى سالتاناتتى تۇردە اشتى. بۇل - شارانىڭ ماڭىزدىلىعىن ايقىنداتتى.
ورتالىق - ەلىمىزدەگى ەڭ ءىرى شاحمات اكادەمياسى بولىپ سانالادى. مۇندا ۇلىتاۋ وبلىسىنىڭ 5 پەن 18 جاس ارالىعىنداعى 1000-عا جۋىق بالا شاحمات ونەرىن مەڭگەرمەك.
اشىلۋ سالتاناتىندا ۇلىتاۋ وبلىسىنىڭ اكىمى داستان رىسپەكوۆ وڭىرىمىزدەن تانىمال شاحماتشىلار مەن ەل چەمپيوندارى شىعىپ، ۇلىتاۋ وبلىسىن تەك رەسپۋبليكالىق دەڭگەيدە عانا ەمەس، الەمدىك ارەنادا دا تانىستىراتىنىنا سەنىم ءبىلدىردى.
900 شارشى مەتر اۋماقتى قامتيتىن جاڭا فيليالدا وقۋشىلار ءۇشىن بارلىق قاجەتتى جاعدايلار جاسالعان. زاماناۋي جابدىقتارمەن قامتاماسىز ەتىلگەن وقۋ ورتالىعى بولاشاق چەمپيوندارعا ساپالى ءبىلىم الۋعا مۇمكىندىك بەرەدى.
سونىمەن قاتار، اكادەميانىڭ اشىلۋى اياسىندا «KAZAKHMYS YOUTH TEAM CHESS CUP» اتتى العاشقى حالىقارالىق بالالار كوماندالىق ءتۋرنيرى ۇيىمداستىرىلدى. بۇل جارىسقا قازاقستان، رەسەي، بەلارۋس، قىرعىزستان جانە موڭعوليادان كەلگەن 100-دەن استام جاس شاحماتشى قاتىستى.
