ازەربايجاننىڭ حيندارح اۋىلىندا بولعان جارىلىس سالدارىنان ءبىر وتباسىنىڭ بەس مۇشەسى قايتىس بولدى، دەپ حابارلايدى "ادىرنا" ۇلتتىق پورتالى Trend.az باسىلىمىنا سىلتەمە جاساپ.
جەرگىلىكتى باق-تىڭ مالىمەتىنشە، قايعىلى وقيعا كىشكەنتاي بالانىڭ قوقىستان گراناتا تاۋىپ الىپ، ونى ۇيىنە اكەلۋىنەن باستالعان. بالا جارىلعىش زاتتى وتباسى مۇشەلەرىنە بەرگەن ساتتە گراناتا ىسكە قوسىلىپ، جويقىن جارىلىس ورىن الدى.
اۋداندىق پروكۋراتۋرانىڭ مالىمەتىنشە، وقيعا سالدارىنان بەس ادام قازا تاۋىپ، تاعى ەكى ادام جاراقات العان. قازا تاپقانداردىڭ ۇشەۋى – بالا.
ازەربايجاننىڭ باس پروكۋراتۋراسى بۇل وقيعاعا بايلانىستى قىلمىستىق ءىس قوزعاپ، تەرگەۋ امالدارىن باستادى. قۇقىق قورعاۋ ورگاندارى جارىلعىش زاتتىڭ اۋىلعا قالاي جەتكەنىن انىقتاۋ جۇمىستارىن جۇرگىزۋدە.
وقيعانىڭ تولىق ءمان-جايى انىقتالىپ جاتىر.
