AQSh-ta kezekti áýe apaty oryn aldy, dep habarlaıdy "Adyrna" ulttyq portaly.
Jergilikti ýaqyt boıynsha 31 qańtar keshki 18:30-da (Qazaqstan ýaqytymen 1 aqpan, 02:30) Fıladelfııanyń soltústik-shyǵys áýejaıynan ushyp shyqqan Learjet 55 medıınalyq ushaǵy turǵyn úılerge qulap, joıqyn órtke sebep boldy.
Ushaq bortynda eki ushqysh, eki dáriger, naýqas jáne onyń týysy bolǵan. AQSh-tyń Federaldy avıaııa basqarmasynyń málimetinshe, apat áýege kóterilgennen 30 sekýnd ótken soń oryn alǵan.
Kýágerlerdiń aıtýynsha, ushaq Kottman dańǵyly men Rýzvelt býlvary mańyndaǵy turǵyn úılerge soǵylǵan. Saldarynan birneshe úı órtenip, janyndaǵy kólikter de zaqymdandy. Jarylystan keıin gaz qubyry zaqymdalyp, órtti sóndirý qıyndaı tústi.
Fıladelfııa meri Sherell Parker baspasóz máslıhatynda alty adamnyń aýrýhanaǵa jetkizilgenin, birneshe úıdiń qatty búlingenin málimdedi. Qaza tapqandar sany áli naqtylanbaǵan.
AQSh-tyń Fox News telearnasy apattyń negizgi sebebi ushaqtaǵy otyn men medıınalyq maqsattaǵy ottegi ballondarynyń qosylýy saldarynan bolǵan jarylys degen boljam aıtty. Tótenshe jaǵdaılar qyzmetkerleri McDonald’s meıramhanasynyń mańynan ottegi ballonyn taýyp, ony tekserýge jibergen.
Ushaq tolyq janarmaı quıylǵan kúıde Mıssýrı shtatyna baǵyt alǵany anyqtaldy. Sarapshylardyń pikirinshe, ushaqtaǵy medıınalyq jabdyqtardyń janǵysh zattarmen baılanysýy apatqa sebep bolýy múmkin.
Apatqa qatysty AQSh prezıdenti Donald Tramp Truth Social jelisinde óz pikirin bildirdi.
"Fıladelfııada taǵy da áýe apaty oryn aldy. Kóz jumǵan jazyqsyz jandarǵa qaıǵyryp kóńil aıtamyn. Federaldy organdar oqıǵany tolyq baqylaýǵa aldy. Jedel áreket etý qyzmetteri keremet jumys atqarýda. Jaqyn arada tolyq aqparat beriledi," – dep jazdy ol.
Apattyń vıdeosy ınternette tarady. Kadrlardan ushaqtyń jerge qatty jyldamdyqpen qulap, úlken jarylys bolǵanyn kórýge bolady.
Qazirgi ýaqytta tergeý jumystary bastaldy. AQSh-tyń avıaııa qaýipsizdigi basqarmasy apattyń naqty sebebin anyqtaý úshin arnaıy komıssııa qurdy.
