قازاقستان ۇلتتىق قۇراماسى باس باپكەرىنىڭ مىندەتىن ۋاقىتشا اتقارۋشى بولىپ وتاندىق مامان ءالي اليەۆ تاعايىندالدى. بۇل تۋرالى ۇلتتىق قۇرامانىڭ ءباسپاسوز قىزمەتى مالىمدەدى، دەپ حابارلايدى “ادىرنا” ۇلتتىق پورتالى.
ءالي اليەۆ حاناليۇلى 1980 جىلعى 27 قازاندا الماتى قالاسىندا دۇنيەگە كەلگەن.
فۋتبولشى مانسابىندا «تسسكا-قايرات»، «قايرات»، «ەرتىس»، «توبىل»، «شىعىس»، «ورداباسى» جانە «قىزىلجار» كلۋبتارىندا وينادى.
1999 جىلى قازاقستان جاستار قۇراماسى ساپىندا نيگەريادا وتكەن جاستار اراسىنداعى الەم چەمپيوناتىنا قاتىستى. ۇلتتىق قۇراما ساپىندا العاشقى ماتچىن 2002 جىلى ەستونياعا قارسى وتكىزدى.
باپكەرلىك مانسابىن 2014 جىلى «ورداباسى» ساپىندا ويىنشى ءارى باپكەر رەتىندە باستادى. 2018 جىلى فۋتبولشى مانسابىن اياقتاعان سوڭ پەتروپاۆلدىڭ «قىزىلجار» كلۋبىنىڭ تىزگىنىن ۇستاپ، پرەمەر-ليگاعا شىعاردى.
2021 جىلى اليەۆ قاراعاندىنىڭ «شاحتەر» كلۋبىندا باس باپكەر بولىپ جۇمىس ىستەپ، كەيىن «استانا» فك جاستار كومانداسىن باسقاردى.
2022 جىلى «جەڭىس» كومانداسىن جاتتىقتىرىپ، سودان كەيىن قايتادان «قىزىلجارعا» ورالدى.
