"وتە ۇيات شەشىم": قازاقستان لەۆيتتىڭ جەكپە-جەگىنە قاتىستى AIBA-عا حات جولدادى

849

قازاقستان بوكس فەدەراتسياسى ەكاتەرينبۋرگتە وتكەن حح الەم چەمپيوناتىنىڭ تورەشىلەرىنە نارازىلىق ءبىلدىردى  

 قازاقستان بوكس فەدەراتسياسى ءاىۆا پرەزيدەنتى مىندەتىن ۋاقىتشا اتقارۋشى مۇحاممەد مۋستاسانعا حات جولدادى. حاتتى ۇلتتىق وليمپيادا كوميتەتى جاريالادى.

قازاقستاندىق تاراپ رەسەيدەگى الەم چەمپيوناتىنىڭ جارتىلاي فينالىندا ۆاسيلي لەۆيت پەن ەكۆادورلىق بوكسشى اراسىندا وتكەن جەكپە-جەكتىڭ ناتيجەسىنە كۇمان كەلتىرىپ، تۇسىنىك بەرۋدى سۇرادى.

"ىرىكتەۋ اينالىمدارىندا تورەشىلەردىڭ بىرنەشە رەت كۇماندى شەشىم قابىلداعانىنا كۋا بولدىق. ال الەم بىرىنشىلىگىنىڭ جارتىلاي فينالىنداعى 91 كەلىدەگى قازاقستاندىق ۆاسيلي لەۆيت پەن ەكۆادورلىق حۋليو تسەزار كاستيللو توررەس اراسىنداعى كەزدەسۋدىڭ شەشىمى ءتىپتى اقىلعا قونبايدى", - دەلىنگەن قفب اتقارۋشى ديرەكتورى بەكجان بەكتەنوۆتىڭ حاتىندا.

ول اتالعان جەكپە-جەكتى تاماشالاعان قازاقستاندىق ساراپشىلاردان بولەك، ولەگ سايتوۆ، الەكسەي تيششەنكو، ەگور مەحونتسەۆ جانە گريگوري دروزد سىندى شەتەلدىك ماماندارىڭ ءوزى بۇل سىندا ۆاسيلي لەۆيتتىڭ جەڭىسكە جەتكەنىنە سەنىمدى ەكەنىن اتاپ وتكەن.

ء"ۇش راۋند بويى قازاقستاندىق بوكسشىسىنىڭ باسىم بولعانىن كوزى قاراقتى جانكۇيەردىڭ ءبارى بايقادى. الايدا ءاىۆا تورەشىلەرى نەلىكتەن مۇنداي شەشىم قابىلداعاندارىن تۇسىندىرگەن جوق. اقش، وڭتۇستىك كورەيا جانە ۋگاندادان كەلگەن ءۇش تورەشى جەڭىستى ەكۆادورلىق بوكسشىعا بەرگەن. ءتىپتى، وڭتۇستىك كورەيالىق تورەشى لەۆيتتىڭ قارسىلاسىنا 30:27 ەسەبىمەن جەڭىستى بەرگەن!", - دەپ جازىلعان قۇجاتتا.

تريبۋنادان تاماشالاعان جانكۇيەرلەرگە كەزدەسۋ تولىقتاي كورىنبەۋى مۇمكىن، بىراق ساراپشىلار تەلەۆيزيالىق جانە ينتەرنەت كورسەتىلىم ارقىلى جەكپە-جەكتى قايتا قاراپ، لەۆيتتى جەڭىمپاز دەپ تانىپ وتىر.

سونداي-اق حاتتا لەۆيتتىڭ باپكەرلەرى نەلىكتەن نارازىلىق ءبىلدىرىپ، شەشىمدى قايتا قارۋعا قول جەتكىزە الماعانى تۇسىندىرىلگەن.

"جاڭا ەرەجەگە سايكەس، باپكەرلەردىڭ شاعىم ءتۇسىرىپ، تورەشىلەر شەشىمىن قايتا قاراۋعا مۇمكىندىك بار. بىراق ەكۆادورلىق بوكسشىنىڭ قولىن كوتەرگەندە ءوز كوزىنە سەنبەگەن جاتتىقتىرۋشىلار ەموتسياعا ەرىك بەرىپ، شارشى الاڭنان كەتىپ قالعان. بىرنەشە سەكۋندتان سوڭ شاعىم بەرۋگە كەلگەن باپكەردى تورەشىلەر القاسى قابىلداماي قويدى", - دەيدى بەكتەنوۆ.

ول سونداي-اق ۆاسيلي لەۆيتكە ريو وليمپياداسىندا دا قيانات جاسالعانىن ەسكە سالدى.

"ريو وليمپياداسىنداعى ەۆگەني تيششەنكو مەن ۆاسيلي لەۆيت اراسىنداعى جەكپە-جەك ەسىڭىزدە شىعار؟! تورەشىلەردىڭ وتە ۇيات شەشىم قابىلداعانى بوكس مارتەبەسىنە سىزات ءتۇسىرىپ، اتالعان كەزدەسۋدى بۇكىل الەم تالقىلاعان بولاتىن. وسىدان سوڭ ءاىۆا تۇتاستاي رەفورما جاساپ، تورەشىلەردى قايتا قارايتىنىن، جەمقورلىقتىڭ جولىن جاباتىنىن مالىمدەگەن ەدى. الايدا، ەكاتەرينبۋرگتەگى الەمدىك سىندا ءاىۆا بۇل ۋادەسىندە تۇرمادى", - دەلىنگەن حاتتا.

قازاقستان ۇزاق جىلدار بويى ءاىۆا باستامالارىن قولداپ، ءتىپتى، ۇزدىك فەدەراتسيا اتاندى.

"بۇگىن، فينالدىق باسەكەلەر قارساڭىندا سىزدەن ءادىل ءارى تازا تورەشلىكتى قامتاماسىز ەتۋدى سۇرايمىز. الەم چەمپيوناتى اياقتالعان سوڭ قازاقستان بوكس فەدەراتسياسى ءاىۆا جارىستارىنداعى تورەشىلىككە قاتىستى رەسمي تۇسىنىك بەرۋدى جانە سىزدەن قانداي شارالار قابىلدانعانىن جەتكىزۋدى سۇرايدى", - دەپ تۇيىندەدى بەكجان بەكتەنوۆ.

Sputnik.

پىكىرلەر