Qazaqstan boks federasiiasy Ekaterinburgte ötken HH älem chempionatynyŋ töreşılerıne narazylyq bıldırdı
Qazaqstan boks federasiiasy AIVA prezidentı mındetın uaqytşa atqaruşy Mūhammed Mustasanǧa hat joldady. Hatty Ūlttyq olimpiada komitetı jariialady.
Qazaqstandyq tarap Reseidegı älem chempionatynyŋ jartylai finalynda Vasilii Levit pen ekvadorlyq boksşy arasynda ötken jekpe-jektıŋ nätijesıne kümän keltırıp, tüsınık berudı sūrady.
"Irıkteu ainalymdarynda töreşılerdıŋ bırneşe ret kümändı şeşım qabyldaǧanyna kuä boldyq. Al älem bırınşılıgınıŋ jartylai finalyndaǧy 91 kelıdegı qazaqstandyq Vasilii Levit pen ekvadorlyq Hulio Sezar Kastillo Torres arasyndaǧy kezdesudıŋ şeşımı tıptı aqylǧa qonbaidy", - delıngen QFB atqaruşy direktory Bekjan Bektenovtıŋ hatynda.
Ol atalǧan jekpe-jektı tamaşalaǧan qazaqstandyq sarapşylardan bölek, Oleg Saitov, Aleksei Tişenko, Egor Mehonsev jäne Grigorii Drozd syndy şeteldık mamandaryŋ özı būl synda Vasilii Levittıŋ jeŋıske jetkenıne senımdı ekenın atap ötken. "Üş raund boiy qazaqstandyq boksşysynyŋ basym bolǧanyn közı qaraqty janküierdıŋ bärı baiqady. Alaida AIVA töreşılerı nelıkten mūndai şeşım qabyldaǧandaryn tüsındırgen joq. AQŞ, Oŋtüstık Koreia jäne Ugandadan kelgen üş töreşı jeŋıstı ekvadorlyq boksşyǧa bergen. Tıptı, Oŋtüstık Koreialyq töreşı Levittıŋ qarsylasyna 30:27 esebımen jeŋıstı bergen!", - dep jazylǧan qūjatta. Tribunadan tamaşalaǧan janküierlerge kezdesu tolyqtai körınbeuı mümkın, bıraq sarapşylar televiziialyq jäne internet körsetılım arqyly jekpe-jektı qaita qarap, Levittı jeŋımpaz dep tanyp otyr. Sondai-aq hatta Levittıŋ bapkerlerı nelıkten narazylyq bıldırıp, şeşımdı qaita qaruǧa qol jetkıze almaǧany tüsındırılgen."Jaŋa erejege säikes, bapkerlerdıŋ şaǧym tüsırıp, töreşıler şeşımın qaita qarauǧa mümkındık bar. Bıraq ekvadorlyq boksşynyŋ qolyn kötergende öz közıne senbegen jattyqtyruşylar emosiiaǧa erık berıp, şarşy alaŋnan ketıp qalǧan. Bırneşe sekundtan soŋ şaǧym beruge kelgen bapkerdı töreşıler alqasy qabyldamai qoidy", - deidı Bektenov.
Ol sondai-aq Vasilii Levitke Rio Olimpiadasynda da qiianat jasalǧanyn eske saldy. "Rio Olimpiadasyndaǧy Evgenii Tişenko men Vasilii Levit arasyndaǧy jekpe-jek esıŋızde şyǧar?! Töreşılerdıŋ öte ūiat şeşım qabyldaǧany boks märtebesıne syzat tüsırıp, atalǧan kezdesudı bükıl älem talqylaǧan bolatyn. Osydan soŋ AIVA tūtastai reforma jasap, töreşılerdı qaita qaraitynyn, jemqorlyqtyŋ jolyn jabatynyn mälımdegen edı. Alaida, Ekaterinburgtegı älemdık synda AIVA būl uädesınde tūrmady", - delıngen hatta. Qazaqstan ūzaq jyldar boiy AIVA bastamalaryn qoldap, tıptı, üzdık federasiia atandy. "Bügın, finaldyq bäsekeler qarsaŋynda sızden ädıl ärı taza töreşlıktı qamtamasyz etudı sūraimyz. Älem chempionaty aiaqtalǧan soŋ Qazaqstan boks federasiiasy AIVA jarystaryndaǧy töreşılıkke qatysty resmi tüsınık berudı jäne Sızden qandai şaralar qabyldanǧanyn jetkızudı sūraidy", - dep tüiındedı Bekjan Bektenov.Sputnik.
