ەكونوميست ماقسات حالىق جاركەنتتەگى تاكسي جۇرگىزۋشىلەرىنىڭ ۇندەۋىنە قاتىستى پىكىر ءبىلدىردى. ول پىكىرىن ينستاگرام پاراقشاسىنا جاريالادى، دەپ حابارلايدى "ادىرنا" ۇلتتىق پورتالى.
ونىڭ ايتۋىنشا، جاركەنت - دەپرەسيۆتى ايماقتىڭ قاتارىنا كىرەدى.
"كەشەلى بەرى ەستىپ جاتقان تاكسيست ازاماتتارىمىزدىڭ ۇندەۋىنە قاتىستى ءارتۇرلى پىكىر بولىپ جاتىر. مەنىڭ ەكونوميست-ساراپشى رەتىندە رەتىندە ايتار ءسوزىم بار. ەگەر ەستەرىڭىزدە بولسا، وسىدان ءبىراز جىل بۇرىن ماسانچيدە بولعان جاعداي، ونىڭ الدىندا مولوۆودنىيدا بولعان جاعدايلار. نە سەبەپتەن ونداي ماسەلەلەر تۋىندايدى؟
ءبىرىنشى كەزەكتە جامبىل وڭىرىندە ورتاشا جالاقى سول ۋاقىتتا ەڭ تومەن بولاتىن. ياعني، دەپرەسسيۆتى ايماق. قازىر الماتى وبلىسى مەن جەتىسۋ وبلىسىن بولگەننەن كەيىن، جەتىسۋ ءوڭىرى دەپرەسسيۆتى ايماققا اينالدى. بۇل وڭىردە حالىقتىڭ تابىسى رەسپۋبليكا بويىنشا سالىستىرعان كەزدە، ەڭ تومەن بولىپ تابىلادى.
سوندىقتان دا تاكسيست باۋىرلارىمىزدىڭ ءسوزىنىڭ جانى بار ەكەندىگىن ايتقىم كەلەدى. سەبەبى، بۇل ءبىرىنشى كەزەكتە، الەۋمەتتىك جاعدايمەن بايلانىستى. ەرتەڭ وسى وڭىردە دە ۇلتارالىق قاقتىعىستار بولىپ جاتسا، تاڭ قالماڭىزدار. مۇنداي جەرلەردى، دەپرەسسيۆتى ايماقتاردى ايقىنداپ، سول وڭىرلەردە حالىقتىڭ تابىسىن ارتتىرۋعا مەملەكەت باسا نازار اۋدارۋ كەرەك. الەۋمەتتىك جاعدايدى كوتەرۋگە، مەملەكەتتەن بولىنەتىن ارنايى قاراجات جاعى بولسىن، پرەسس-كونفەرەنتسيالار جاعى بولسىن ءبىرىنشى كەزەككە قويۋ كەرەك. سول كەزدە عانا وڭىرلەردە الەۋمەتتىك تەڭدىك ورنايدى. حالىقتىڭ جاعدايى ءوڭىر ارالىق ءارتۇرلى بولماي جانە بەلگىلى ءبىر دارەجەدە ەلدىڭ دامۋىنا ءوزىنىڭ ۇلەسىن قوساتىن بولادى. وسى ماسەلەنى ءبىزدىڭ شەندىلەر ەسىندە ۇستايدى دەپ ويلايمىن", - دەدى ەكونوميست.
ەسكە سالايىق، كەشە جاركەنت قالاسىنداعى ءبىر توپ كولىك جۇرگىزۋشىلەر قالاعا سىرتتان كەلىپ كىسى تاسيتىنداردى كىرگىزبەيتىنىن، "ارتى قانتوگىسكە ۇلاسۋى مۇمكىن" ەكەندىگىن ايتىپ، مالىمدەمە جاساعن بولاتىن.
