Mádenıet jáne aqparat mınıstri Aıda Balaeva áleýmettik jelide aqparat taratatyndarǵa úndeý jasady. Bul týraly ol paraqshasynda jazdy, dep habarlaıdy “Adyrna” ulttyq portaly.
Mınıstr onlaın-platformalarda zańǵa qaıshy, shyndyqqa janaspaıtyn aqparat jıi taralatynyna narazy. Ol osyǵan baılanysty jelilik resýrstardyń ákimshilerin jańalyqtar aǵynyn muqııat qadaǵalaýǵa, rastalmaǵan aqparattyń taralýyna jol bermeýge shaqyrdy. Mınıstr áleýmettik jeli qoldanýshylaryna da jazbalar men pikirlerin zań talabyna saı jazýdy usyndy.
«Statıstıkaǵa súıensek, 2023 jyldan 2024 jylǵa deıingi aralyqta Qazaqstan ınternet segmentinde anyqtalǵan zańǵa qaıshy kontent kólemi eki ese ósip, 116 354 materıalǵa jetti. Eń kóp taralǵan zańbuzýshylyqtar qatarynda – terrorızmdi, dinı ekstremızmdi jáne esirtki quraldaryn nasıhattaý, onlaın-kazıno men qarjy pıramıdalaryn jarnamalaý bar. Ótken jyly onlaın-platformalarda 78 539 zańǵa qaıshy materıal anyqtalyp, onyń 24,3%-y joıyldy», - dedi Aıda Balaeva.
Eske salaıyq, buǵan deıin Qaznews2024 pablıginiń ákimshisi Temirlan Eńsebek 2 aı merzimge qamaýǵa alynǵanyn habarlaǵan edik. Oǵan taǵylǵan 174-bap tek arazdyq qozdyrý ǵana emes, sondaı-aq osy sanatqa jatatyn materıaldardy taratý boıynsha da jaýapkershilik júkteıdi.