قازاقستاندىق كومپانيالار ەو-نىڭ 16-شى سانكتسيالار پاكەتىنە ەنۋى مۇمكىن. بۇل تۋرالى ەۋروپالىق وداقتىڭ سانكتسيالار جونىندەگى ارنايى وكىلى دەۆيد و'سالليۆان ايتتى، دەپ حابارلايدى “ادىرنا” ۇلتتىق پورتالى.
«قازىر ءبىز جاڭا 16-شى سانكتسيالىق پاكەتتى دايىنداۋ ۇستىندەمىز. قازاقستاندىق كومپانيالار دا تىزىمگە ەنگىزىلۋى مۇمكىن، بىراق شەشىم ءالى قابىلدانعان جوق. سوندىقتان دا، بۇل تىزىمگە تەك سانكتسيالاردى بۇزۋعا قاتىسى بار ەكەنىن دالەلدەيتىن ايعاقتار بار كومپانيالار عانا ەنگىزىلەتىنىن تاعى ءبىر رەت اتاپ وتكىم كەلەدى»، – دەدى ەو-نىڭ سانكتسيالار جونىندەگى ارنايى ەلشىسى دەۆيد و'سالليۆان.
سونىمەن بىرگە، و'سالليۆان جالپى ەو سانكتسيالاردى ساقتاۋ بويىنشا قازاقستانمەن قارىم-قاتىناستا بايقالعان قارقىن مەن ديناميكاعا قاناعاتتاناتىنىن ايتتى. ول سونداي-اق ەو قازاقستاننىڭ سانكتسيالارعا قوسىلماۋ ۇستانىمىن تولىعىمەن قۇرمەتتەيتىنىن اتاپ ءوتتى.
«ءبىز قازاقستاندى سانكتسيالاردى قابىلداۋعا ماجبۇرلەمەيمىز ءبىزدىڭ قازاقستان مەن رەسەيدىڭ زاڭدى ساۋدا قاتىناستارىن بۇزۋعا نيەتىمىز جوق. بىراق ءبىزدى الاڭداتاتىنى – كەيبىر زاڭسىز بيزنەس وكىلدەرى قازاقستاندى سانكتسيالاردى اينالىپ وتەتىن الاڭ رەتىندە پايدالانىپ، كەيىن وسى ونىمدەر رەسەي قارۋلارى ءۇشىن قولدانىلاتىن ەو-دا وندىرىلگەن جوعارى تەحنولوگيالىق تاۋارلاردى قايتا ساتۋ مۇمكىندىگىن كورە الادى. ياعني، ءبىز سانكتسيالىق تىزىمگە ەنگەن تاۋارلار مەن ونىمدەر تۋرالى ايتىپ وتىرمىز»، – دەپ ءتۇسىندىردى ەو-نىڭ سانكتسيالار جونىندەگى ارنايى ەلشىسى.
