بۇگىن، 30 قاڭتار، كورنەكتى اقىن، جۋرناليست كەڭشىلىك مىرزابەكوۆتىڭ ومىردەن وتكەنىنە 36 جىل تولدى.
كەڭشىلىك اعىتايۇلى مىرزابەكوۆ 1946 جىلى قوستاناي وبلىسى، جانگەلدى اۋدانى، جانىبەك تارحان اۋىلىندا دۇنيەگە كەلگەن. ول قازمۋ-دىڭ جۋرناليستيكا فاكۋلتەتىن ءتامامداپ، ۇزاق جىلدار بويى رەسپۋبليكالىق باسىلىمداردا قىزمەت ەتتى. ونىڭ “ىڭكار دۇنيە” (1972), ء“سارۋار” (1980), “قاسيەتتى قاس-قاعىم” (1985), ء“داۋىر – داستان” (1988) سىندى جىر جيناقتارى وقىرمان جۇرەگىنەن ورىن الدى. اقىن پوەزياسىندا تۋعان جەرگە دەگەن سۇيىسپەنشىلىك، ومىرگە ىڭكارلىك، تەرەڭ فيلوسوفيالىق ويلار مەن ازاماتتىق كوزقاراس ەرەكشە كورىنىس تاپتى.
بۇگىندە اقىننىڭ مۇراسىن جالعاپ، شىعارماشىلىعىن ناسيحاتتاپ جۇرگەن ۇلى امانگەلدى كەڭشىلىكۇلى اكەسىنە دەگەن ساعىنىشىن Facebook پاراقشاسىندا جەتكىزدى.
“اكە! ەكەۋمىزدىڭ دە جەردە جۇرگەنىمىز كۇنى كەشە عانا ەدى عوي. جالعان دۇنيە-اي! سەنىڭ بۇل بەيمازا تىرشىلىكپەن ماڭگى قوش ايتىسىپ كەتكەنىڭە جىل ارتىنان جىل وتسە دە، سەن مەن ءۇشىن ءالى ءتىرىسىڭ…” - دەپ جازبا جاريالادى.
كەڭشىلىك مىرزابەكوۆ اقىندىق جولىندا تەك ءوز شىعارمالارىمەن شەكتەلمەي، ەۆگەني ەۆتۋشەنكونىڭ “مەنىڭ شەشەم جانە نەيترون بومباسى” جانە “فۋكۋ” اتتى پوەمالارىن قازاق تىلىنە اۋدارعان. سونىمەن قاتار، ونىڭ پۋبليتسيستيكالىق ەڭبەكتەرى مەن ادەبيەتكە ارنالعان زەرتتەۋلەرى دە جوعارى باعالاندى.
2006 جىلى الماتى قالاسىنداعى كوشەلەردىڭ بىرىنە كەڭشىلىك مىرزابەكوۆتىڭ ەسىمى بەرىلدى. بۇل – ونىڭ شىعارماشىلىعى مەن قازاق ادەبيەتىنە قوسقان ۇلەسىنىڭ مويىندالۋىنىڭ ءبىر كورىنىسى.
