Búgin, 30 qańtar, kórnekti aqyn, jýrnalıst Keńshilik Myrzabekovtiń ómirden ótkenine 36 jyl toldy.
Keńshilik Aǵytaıuly Myrzabekov 1946 jyly Qostanaı oblysy, Jangeldi aýdany, Jánibek Tarhan aýylynda dúnıege kelgen. Ol QazMÝ-dyń jýrnalıstıka fakýltetin támamdap, uzaq jyldar boıy respýblıkalyq basylymdarda qyzmet etti. Onyń “Ińkár dúnıe” (1972), “Sárýar” (1980), “Qasıetti qas-qaǵym” (1985), “Dáýir – dastan” (1988) syndy jyr jınaqtary oqyrman júreginen oryn aldy. Aqyn poezııasynda týǵan jerge degen súıispenshilik, ómirge ińkárlik, tereń fılosofııalyq oılar men azamattyq kózqaras erekshe kórinis tapty.
Búginde aqynnyń murasyn jalǵap, shyǵarmashylyǵyn nasıhattap júrgen uly Amangeldi Keńshilikuly ákesine degen saǵynyshyn Facebook paraqshasynda jetkizdi.
“Áke! Ekeýmizdiń de jerde júrgenimiz kúni keshe ǵana edi ǵoı. Jalǵan dúnıe-aı! Seniń bul beımaza tirshilikpen máńgi qosh aıtysyp ketkenińe jyl artynan jyl ótse de, sen men úshin áli tirisiń…” - dep jazba jarııalady.
Keńshilik Myrzabekov aqyndyq jolynda tek óz shyǵarmalarymen shektelmeı, Evgenıı Evtýshenkonyń “Meniń sheshem jáne neıtron bombasy” jáne “Fýký” atty poemalaryn qazaq tiline aýdarǵan. Sonymen qatar, onyń pýblııstıkalyq eńbekteri men ádebıetke arnalǵan zertteýleri de joǵary baǵalandy.
2006 jyly Almaty qalasyndaǵy kóshelerdiń birine Keńshilik Myrzabekovtiń esimi berildi. Bul – onyń shyǵarmashylyǵy men qazaq ádebıetine qosqan úlesiniń moıyndalýynyń bir kórinisi.
