دارحان احمەد-زاكي م.اۋەزوۆ اتىنداعى وڭتۇستىك قازاقستان ۋنيۆەرسيتەتىنىڭ رەكتورى قىزمەتىنە تاعايىندالدى، دەپ حابارلايدى "ادىرنا" ۇلتتىق پورتالى.
بۇعان دەيىن ول قازاقستاننىڭ عىلىم جانە جوعارى ءبىلىم ۆيتسە-ءمينيسترى قىزمەتىن اتقارعان بولاتىن. وسى قىزمەتكە 2023 جىلدىڭ قىركۇيەك ايىندا تاعايىندالعان ەدى.
دارحان احمەد-زاكي 1981 جىلى شىعىس قازاقستان وبلىسىندا دۇنيەگە كەلگەن. ول ءال-فارابي اتىنداعى قازاق مەملەكەتتىك ۋنيۆەرسيتەتىن جانە ق. ساتباەۆ اتىنداعى قازاق مەملەكەتتىك تەحنيكالىق ۋنيۆەرسيتەتىن بىتىرگەن.
ەڭبەك جولىن 2002 جىلى الماتى قالاسىنداعى رەسپۋبليكالىق مەديتسينا كوللەدجىندە فيزيكا جانە ماتەماتيكا پاندەرىنىڭ وقىتۋشىسى بولىپ باستاعان. 2003 جىلى جاڭاوزەن قالاسىندا «قازاقويل» جاق تەحنولوگيالىق زەرتتەۋلەر ورتالىعىندا ينجەنەر-باعدارلاماشى بولىپ قىزمەت ەتكەن.
2004-2012 جىلدارى ءال-فارابي اتىنداعى قازۇۋ مەحانيكا-ماتەماتيكا فاكۋلتەتىندە اسسيستەنت، وقىتۋشى، اعا وقىتۋشى، دوتسەنت جانە دەكاننىڭ وقۋ-تاربيە ءىسى جونىندەگى ورىنباسارى قىزمەتتەرىن اتقاردى. 2012-2013 جىلدارى فاكۋلتەت دەكانى بولىپ قىزمەت ەتتى. ال 2013-2016 جىلدارى قازۇۋ وقۋ ءىسى جونىندەگى پرورەكتورى قىزمەتىندە بولدى.
2016-2017 جىلدارى قر ءبىلىم جانە عىلىم مينيسترلىگىنىڭ جوعارى جانە جوعارى وقۋ ورنىنان كەيىنگى ءبىلىم دەپارتامەنتىنىڭ ديرەكتورى بولدى. 2017-2020 جىلدارى حالىقارالىق بيزنەس ۋنيۆەرسيتەتىنىڭ پرەزيدەنتى، 2020-2022 جىلدارى Astana IT University رەكتورى بولدى. 2022 جىلدان 2023 جىلدىڭ قىركۇيەگىنە دەيىن قر عىلىم جانە جوعارى ءبىلىم مينيسترلىگى عىلىم كوميتەتىنىڭ توراعاسى قىزمەتىن اتقاردى.
