ءماجىلىس دەپۋتاتى رينات زايتوۆ قازاقستان رەسپۋبليكاسىنىڭ پرەمەر-ءمينيسترى ولجاس بەكتەنوۆكە اۋىلداردىڭ جاعدايىنا قاتىستى دەپۋتاتتىق ساۋال جولدادى. ول ءوز مالىمدەمەسىندە تاۋەلسىزدىك جىلدارىندا ءتۇرلى دامۋ باعدارلامالارى قولعا الىنعانىمەن، اۋىلداردىڭ جاعدايى كۇردەلى كۇيىندە قالىپ وتىرعانىن اتاپ ءوتتى.
دەپۋتاتتىڭ ايتۋىنشا، سوڭعى جىلدارى ەلدەگى جۇزدەگەن اۋىلدار بوس قالىپ، ءتىپتى مۇلدە جويىلىپ كەتكەن. ستاتيستيكالىق دەرەكتەرگە سۇيەنسەك، سوڭعى بەس جىلدا شىعىس قازاقستان وبلىسىندا – 350, سولتۇستىك قازاقستان وبلىسىندا – 635, پاۆلودار وبلىسىندا – 352 اۋىل قاڭىراپ قالعان. تەك 2024 جىلدىڭ وزىندە سولتۇستىك قازاقستان وبلىسىندا 141 اۋىل مارتەبەسىنەن ايىرىلعان.
رينات زايتوۆ اۋىل حالقىنىڭ قالاعا جاپپاي كوشۋىنە نەگىزگى سەبەپ رەتىندە ساپالى ينفراقۇرىلىمنىڭ، مەديتسينالىق قىزمەتتىڭ، تۇراقتى جۇمىستىڭ جانە ينتەرنەتتىڭ جوقتىعىن اتاپ ءوتتى. ونىڭ پىكىرىنشە، بۇل ماسەلەنى شەشۋ ءۇشىن قازىرگى «اۋىل – ەل بەسىگى»، «اۋىل اماناتى» سياقتى باعدارلامالاردىڭ وزدەرى جەتكىلىكسىز، مەملەكەتتىك قولداۋ اياسىن كەڭەيتۋ قاجەت.
پرەزيدەنت قاسىم-جومارت توقاەۆتىڭ جۋىرداعى ۇكىمەتتىڭ كەڭەيتىلگەن وتىرىسىندا اۋىلداردى دامىتۋ باعدارلامالارىن ءبىر جۇيەگە بىرىكتىرۋ تۋرالى ۇسىنىسىنا توقتالعان دەپۋتات، بۇل ماسەلەگە جۇيەلى تۇردە قاراۋ قاجەتتىگىن جەتكىزدى.
وسىعان بايلانىستى رينات زايتوۆ ۇكىمەت باسشىسىنا تومەندەگىدەي ۇسىنىستارىن جولدادى:
- اۋىل اكىمدەرىنىڭ وكىلەتتىكتەرىن كۇشەيتۋ;
- ءار اۋىلدى قاجەتتى تەحنيكامەن قامتاماسىز ەتۋ;
- اۋىلداردى ساقتاۋ ماسەلەسىن ۇلتتىق دەڭگەيگە كوتەرىپ، ۇكىمەت پەن وبلىس اكىمدەرى دەڭگەيىندە ارنايى مەملەكەتتىك كوميسسيا قۇرۋ;
- جاستاردى اۋىلدىق جەرلەرگە تۇراقتاندىرۋ مەن قونىستاندىرۋعا باعىتتالعان ناقتى جوسپار ازىرلەپ، ونى حالىققا ءتۇسىندىرۋ.
