Mäjılıs deputaty Rinat Zaitov Qazaqstan Respublikasynyŋ Premer-Ministrı Oljas Bektenovke auyldardyŋ jaǧdaiyna qatysty deputattyq saual joldady. Ol öz mälımdemesınde täuelsızdık jyldarynda türlı damu baǧdarlamalary qolǧa alynǧanymen, auyldardyŋ jaǧdaiy kürdelı küiınde qalyp otyrǧanyn atap öttı.
Deputattyŋ aituynşa, soŋǧy jyldary eldegı jüzdegen auyldar bos qalyp, tıptı mülde joiylyp ketken. Statistikalyq derekterge süiensek, soŋǧy bes jylda Şyǧys Qazaqstan oblysynda – 350, Soltüstık Qazaqstan oblysynda – 635, Pavlodar oblysynda – 352 auyl qaŋyrap qalǧan. Tek 2024 jyldyŋ özınde Soltüstık Qazaqstan oblysynda 141 auyl märtebesınen aiyrylǧan.
Rinat Zaitov auyl halqynyŋ qalaǧa jappai köşuıne negızgı sebep retınde sapaly infraqūrylymnyŋ, medisinalyq qyzmettıŋ, tūraqty jūmystyŋ jäne internettıŋ joqtyǧyn atap öttı. Onyŋ pıkırınşe, būl mäselenı şeşu üşın qazırgı «Auyl – el besıgı», «Auyl amanaty» siiaqty baǧdarlamalardyŋ özderı jetkılıksız, memlekettık qoldau aiasyn keŋeitu qajet.
Prezident Qasym-Jomart Toqaevtyŋ juyrdaǧy Ükımettıŋ keŋeitılgen otyrysynda auyldardy damytu baǧdarlamalaryn bır jüiege bırıktıru turaly ūsynysyna toqtalǧan deputat, būl mäselege jüielı türde qarau qajettıgın jetkızdı.
Osyǧan bailanysty Rinat Zaitov Ükımet basşysyna tömendegıdei ūsynystaryn joldady:
- Auyl äkımderınıŋ ökılettıkterın küşeitu;
- Är auyldy qajettı tehnikamen qamtamasyz etu;
- Auyldardy saqtau mäselesın ūlttyq deŋgeige köterıp, Ükımet pen oblys äkımderı deŋgeiınde arnaiy memlekettık komissiia qūru;
- Jastardy auyldyq jerlerge tūraqtandyru men qonystandyruǧa baǧyttalǧan naqty jospar äzırlep, ony halyqqa tüsındıru.
