تاراز قالاسىندا «رۋحاني جاڭعىرۋ» باعدارلاماسى اياسىندا «ەلدىك ەلگە بايلانىستى» اتتى فورۋمى ءوتتى. شاراعا وبلىس اكىمى اسقار مىرزاحمەتوۆ، ارداگەرلەر، زيالى قاۋىم وكىلدەرى، بيلەر كەڭەسىنىڭ مۇشەلەرى، ۇلتتىق مادەني ورتالىقتاردىڭ، ۇكىمەتتىك ەمەس ۇيىمداردىڭ جەتەكشىلەرى، وقىتۋشىلار مەن جاستارقاتىستى.
وبلىستىق اۋماقتىق كاسىپوداقتار بىرلەستىگىنىڭ توراعاسى مەيرامبەك تولەپبەرگەننىڭ ايتۋىنشا، قوعامدىق كەلىسىم مەن ساياسي تۇراقتىلىقتى ساقتاۋ وتە ماڭىزدى. سونداي-اق ول ەتنوسارالىق جانە كونفەسسياارالىق بەيبىتشىلىك، بىرلىك پەن ىنتىماق، ۇلتتىق قۇندىلىقتاردى جاڭعىرتۋ ماقساتىنا نەگىزدەلگەن فورۋمنىڭ بەرەرى مول ەكەنىن تىلگە تيەك ەتتى.
ال، تاراز قالالىق ءماسليحاتتىڭ حاتشىسى باتىربەك كۇلەكەەۆ فورۋمنىڭ ماڭىزدىلىعىن اتاپ ءوتىپ، ىسىراپشىلدىققا ارنايى توقتالدى.
«شىنى كەرەك سوڭعى كەزدە قوعامداعى كەرتارتپالىق پەن ىسىراپشىلىق تۋرالى ءبىر توقتامعا كەلۋىمىز كەرەك سەكىلدى. ويتكەنى بۇگىنگى تويلارداعى، ءولىم-جىتىمدەگى ىسىراپشىلدىق پەن بەي-بەرەكەتسىزدى بىرىزدىلىككە ءتۇسىرۋ كەرەك. قازاق حالقى بىرلىكتىڭ ورنى مەن ماڭىزىن جوعارى باعالاپ، «بىرلىك بولماي تىرلىك بولماس»، «بىرلىك ءتۇبى – بەرەكە»، «باقىت – بىرلىكتە، بايلىق – ەڭبەكتە» دەپ تۇيگەن. سوندىقتان دا، ەل تىزگىنىن قولىنا ۇستاعان ارداقتى ادامدار – حاندار، بيلەر، اۋزى دۋالى اقساقالدار ەل ىشىندەگى اسقىنعان داۋ، ۋشىققان جانجالدىڭ جولىنا توسقاۋىل قوياردا ەل بىرلىگىنە سىنا تۇسپەۋ جاعىنا باسا نازار اۋدارعان»، – دەدى ب.كۇلەكەەۆ.
سونداي-اق، تويحانالارعا سالىق سالۋ، جاستاردىڭ تاربيەسىنە ەرەكشە نازار اۋدارۋ تۋرالى ويلارىمەن ءبولىستى. باسقوسۋ بارىسىندا وزگە دە ءسوز العان اقساقالدار مەن ەل اعالارى قوعامداعى تۇيىتكىلدى ماسەلەلەر، ۇلتتىق ءداستۇر مەن ادەت-عۇرىپتىڭ ۋاقىت اعىمىمەن وزگەرۋى، ىسىراپشىلدىق پەن داڭعازالىققا جول بەرمەۋ، جاستار تاربيەسىنىڭ وزەكتىلىگى حاقىندا ايتىپ ءوتتى.
فورۋمدى قورىتىندىلاعان ايماق باسشىسى اسقار مىرزاحمەتوۆ كوتەرىلگەن ماسەلەلەر توعىسىندا وبلىس تۇرعىندارىن بىرلىك پەن ىنتىماققا، سابىرلىق پەن قاناعاتشىلىققا، بەرەكەلى ءومىر سۇرۋگە شاقىرىپ، قاتىسۋشىلار تاراپىنان ۇندەۋ جولدادى.
«جاھاندىق الەممەن قابىسپايتىن، ۇلتتىڭ دامۋىنا كەدەرگى كەلتىرىپ، ەل ىشىنە ىرىتكى سالاتىن وتكەننىڭ كەيبىر كەرتارتپا داعدىلارى مەن ادەتتەرىنەن كۇنى بۇگىنگە دەيىن ارىلا الماي وتىرعانىمىز جاسىرىن ەمەس. ولار: جەڭ ۇشىنان جالعاسقان جەمقورلىق، جەرشىلدىك، تامىر-تانىستىق، جۇزشىلدىك پەن رۋشىلدىق، ىسىراپشىلدىق پەن استامشىلدىق، داڭعويلىق پەن كەردەڭدىك، ورىنسىز سالتانات، قاناعاتسىزدىق پەن ۇنەمسىزدىك. وركەنيەتىلىككە ەمەس وسەككە، زيالىلىققا ەمەس زياندىققا، پاراساتتىلىققا ەمەس پاسىقتىققا، ىزگىلىككە ەمەس ىبىلىستىككە جەتەلەيتىن مۇنداي «عۇرىپتاردان» قۇتىلاتىن كەزەڭ كەلدى. «ىرگەلى ەلدىڭ ىرگەسىن ەسەر اعىم بۇزار» دەگەندەي، بۇگىنگى تاڭدا دەسترۋكتيۆتى ءدىني اعىمداردىڭ ەل اراسىنا ەتەنە ەنىپ، جاستاردىڭ ساناسىن ۋلاپ جاتقانى دا بارشا جۇرتتى الاڭداتىپ وتىرعان كۇردەلى ماسەلە. بۇل ءۇردىستىڭ تامىرىنا بالتا شاۋىپ، ۇلاعاتتى ۇرپاق تاربيەلەۋدە زايىرلى ءبىلىمدى ۇلتتىق قۇندىلىقتارىمىزبەن ساباقتاستىرا وتىرىپ ءتۇسىندىرۋ – بارشامىزدىڭ باستى ماقساتىمىزعا اينالۋى ءتيىس»، – دەلىنگەن ۇندەۋدە.
سونىمەن قاتار، بۇقارالىق اقپارات قۇرالدارى وسى باعىتتا ناسيحات جۇمىستارىن ۇيىمداستىرۋ، الەۋمەتتىك جەلىنى پايدالانۋشىلاردىڭ جاۋاپكەرشىلىگىن ارتتىرۋ ءۇشىن ارنايى زاڭ بەكىتۋ كەرەكتىگى ايتىلعان.
«ادىرنا»
ۇلتتىق پورتالى
