وزبەكستاننىڭ Uzbekistan Airways ۇلتتىق اۋە كومپانياسى ەۋروپاعا ۇشۋ ءۇشىن رەسەي مەن بەلارۋس اۋە كەڭىستىگىن پايدالانۋدى توقتاتتى. بۇل شەشىم 20 قاڭتاردان باستاپ جۇزەگە اسىرىلۋدا. اقپاراتتى اۆياكومپانيا وكىلدەرى 28 قاڭتاردا اۋە كومپانياسىنىڭ 33 جىلدىعىنا ارنالعان ءباسپاسوز ءماسليحاتىندا ايتتى، دەپ حابارلايدى “ادىرنا” ۇلتتىق پورتالى.
فەرعانا اگەنتتىگىنىڭ مالىمەتىنشە، جۋرناليستەردىڭ “ازىربايجاندىق AZAL ۇشاعى اپاتىنىڭ اسەرى بولدى ما؟” دەگەن سۇراعىنا كومپانيا وكىلدەرى «بۇل جاي عانا ساقتىق شارالارى جانە بەلگىلى ءبىر دارەجەدە مارشرۋتتاردى وڭتايلاندىرۋ» دەپ جاۋاپ بەردى.
ال Daryo.uz Telegram-كانالىندا جاريالانعان مالىمەتكە سايكەس، Uzbekistan Airways ەۋروپا ەلدەرىنە ۇشاتىن رەيستەرىن قازىر ازەربايجان مەن تۇركيا ارقىلى جۇزەگە اسىرادى.
ەسكە سالا كەتەيىك، 2024 جىلى 25 جەلتوقساندا باكۋدان گروزنىيعا باعىتتالعان ن ازەربايجاندىق AZAL اۋە كومپانياسىنىڭ Embraer 190 ۇشاعى قازاقستاننىڭ باتىسىنداعى اقتاۋعا جاقىن جەردە اپاتقا ۇشىرادى. ۇشاقتا 67 ادام بولعان، ونىڭ ىشىندە 5 ەكيپاج مۇشەسى. 38 ادام قازا تاپتى، 29 ادام امان قالدى.
27 جەلتوقساندا ازەربايجان اۋە كومپانياسى مەن ازەربايجاننىڭ تسيفرلىق دامۋ جانە كولىك ءمينيسترى راشاد نابيەۆ ۇشاقتىڭ اپاتقا ۇشىراۋىنا «سىرتقى اسەر» سەبەپ بولعانىن حابارلادى. اپاتتان امان قالعان بورتسەرىكتەردىڭ ايتۋىنشا، ۇشاق گروزنىي ۇستىنەن ۇشىپ بارا جاتقاندا ءۇش رەت سوققىعا ۇشىراعان. اقش ماماندارى ۇشاقتى رەسەيدىڭ پۆو جۇيەسىمەن اتىپ ءتۇسىرۋ ىقتيمالدىعىن بايقاپ، وسىنداي بەلگى-نىشانداردى كورگەنىن ايتتى. رەسەيلىك باق-تىڭ مالىمەتىنشە، ۇشاقتىڭ اتىلعان ساتىندە گروزنىي ۋكراينالىق درونداردىڭ شابۋىلىنا ۇشىراعان.
اپاتتان كەيىن بىرنەشە مەملەكەت پەن اۋە كومپانيالارى رەسەيگە ۇشاتىن رەيستەردى توقتاتۋ تۋرالى مالىمدەدى.
قاڭتار ايىنىڭ باسىندا ەۋروپالىق اۆياتسيالىق قاۋىپسىزدىك اگەنتتىگى (EASA) ەۋروپاعا ۇشاتىن ءۇشىنشى ەلدەردىڭ اۋە كومپانيالارىنا رەسەيدىڭ ەۋروپالىق بولىگىندەگى ۇشۋلاردان اۋلاق بولۋعا كەڭەس بەردى. بۇل ەسكەرتۋ «رەسەي اۋماعىندا ازاماتتىق جانە اسكەري اۆياتسيانىڭ ۇيلەستىرۋىندەگى مۇمكىن بولاتىن ولقىلىقتار مەن قاتەلەسىپ تانۋ ىقتيمالدىعى» سەبەپتى ازاماتتىق ۇشاقتارعا جاسالاتىن ادەيى ەمەس شابۋىلدار قاۋپىنە بايلانىستى بولدى.
EASA سونداي-اق رەسەيدىڭ پۆو جۇيەلەرىنىڭ جۇمىسقا قوسىلۋى مۇمكىن ەكەندىگىنە نازار اۋداردى، بۇل ۋكراينا زىمىراندارى مەن دروندارىنىڭ ىسكە قوسىلۋىنا جاۋاپ رەتىندە ازاماتتىق ۇشاقتارعا قاۋىپ ءتوندىرۋى مۇمكىن. بۇل جاعداي بىرنەشە حالىقارالىق اۋەجايلاردا رەيستەردى ورىنداۋعا اسەر ەتۋى مۇمكىن، دەپ ەسكەرتتى اگەنتتىك. سونىمەن قاتار، رەسەي بيلىگى بۇل قاۋىپتەردى ازايتۋ بويىنشا شارالار قابىلدامايتىنى اتاپ ءوتىلدى.
