بۇگىن فۋتبول جانكۇيەرلەرى ايگىلى كريشتيانۋ رونالدۋنى تاجىكستان استاناسى دۋشانبەدە كۇتىپ ەدى. «ۆيزا الدى» دەگەلى ونىڭ جولىنا قاراپ كوزى تالعاندار كوپ بولعان. ەرتەڭ دۋشانبەدە تاجىكستاننىڭ «يستيقلول» كومانداسى ساۋد ارابياسىنىڭ «ءال-ناسر» كومانداسىمەن كەزدەسەدى.
افك (ازيا فۋتبول كونفەدەراتسياسى) 2023/24 ماۋسىمىنداعى چەمپيوندار ليگاسىنىڭ توپتىق كەزەڭىنىڭ التىنشى تۋرىندا تاجىكستاننىڭ «يستيقلول» كومانداسىمەن ساۋد ارابياسىنىڭ «ءال-ناسر» كومانداسىمەن كەزدەسەدى. الايدا سوڭعى ساتتە كوپشىلىك كۇتكەن ايگىلى فۋتبولشى كريشتيانۋ رونالدۋنىڭ دۋشانبەگە كەلمەيتىنى بەلگىلى بولدى. «ە» توبىنداعى فۋتبولدان تاجىكستان مەن ساۋد ارابياسىنىڭ چەمپيوندارى اراسىنداعى سوڭعى تۋر ويىنى سەيسەنبى، 5 جەلتوقسان كۇنى دۋشانبەنىڭ ورتالىق ستاديونىندا ساعات 21:00-دە باستالادى.
كريشتيانۋ تاجىكستانعا كەلۋدەن نەگە باس تارتتى؟
«يستيقلول» فۋتبول كلۋبىنىڭ ءباسپاسوز حاتشىسى رۋستام حاكيموۆ 30 قاراشادا ورتالىق ستاديوننىڭ كاسسالارىندا اتالعان ماتچقا 10 مىڭنان استام بيلەت ساتىلىپ كەتكەنىن ايتتى. حالىق رونالدۋنى دۋشانبەگە كەلەدى دەپ كۇتكەن. ونىڭ وسى ساپارى ءۇشىن ۆيزاسى بەرىلگەنى دە حابارلانعان.
بىراق بۇگىن رونالدۋنىڭ كەلمەيتىنى جايلى اقپاراتتى «ازيا-پليۋس» اگەنتتىگىنە «يستيقلول» فۋتبول كلۋبى راستادى.
Football-fun-live.com سايتى افك چەمپيوندار ليگاسىنىڭ سوڭعى تۋرىندا «يستيقلولمەن» ماتچتا كريشتيانۋ رونالدۋنىڭ ەسىمى جوق ەكەنىن جازدى.
Varzish سپورت ارناسىنىڭ حابارلاۋىنشا، رونالدۋنىڭ يراندىق «پەرسەپوليسكە» قارسى ويىندا العان جاراقاتى ونىڭ بۇل كەزدەسۋگە قاتىسۋىنا كەدەرگى بولعان.
«دۋشانبەدەگى ورتالىق ستاديوندا ويىنعا بيلەتتەر ءۇش سانات بويىنشا ساتىلادى. باتىس ستەندىنە ءبىرىنشى ساناتتاعى بيلەتتىڭ باعاسى 300 سوموني (27 دوللار شاماسىندا) تۇرادى. قالعان تريبۋنالار ءۇشىن ەكىنشى ساناتتاعى بيلەت باعاسى – 100 سوموني (9 دوللار شاماسى). قۇنى 3000 (274 دوللار) سوموني تۇراتىن VIP بيلەتتەر دە بار»، - دەگەن اۋەلدە رۋستام حاكيموۆ.
ە توبىنداعى يراندىق «پەرسەپوليس» پەن قاتارلىق «اد-دۋحايل» اراسىنداعى ەكىنشى ويىن دا 5 جەلتوقساندا تەگەرانداعى «وزودي» ستاديونىندا وتەدى.
ەسكە سالايىق، 2 قازان كۇنى ساۋد ارابياسىنىڭ ەر-رياد قالاسىنداعى «ال-اۆال پارك» ستاديونىندا وتكەن توپتىق ءتۋرنيردىڭ ەكىنشى اينالىمىنداعى «ءال-ناسر» مەن «يستيقلول» اراسىنداعى ءبىرىنشى ويىندا «يستيقلولدىڭ» قارسىلاستارى 3:1 ەسەبىمەن جەڭىسكە جەتكەن بولاتىن. بۇل ويىندى كەيىن تەلەديداردان 200 ميلليوننان استام كورەرمەن تاماشالادى. بۇل – ازيا چەمپيوندار ليگاسىنىڭ تاريحىنداعى رەكوردتىق كورسەتكىش.
«ءال-ناسر» پلەي-وففتا
قازىرگى ۋاقىتتا ە توبىنىڭ تۋرنيرلىك كەستەسىندە «ءال-ناسر» كومانداسى 13 ۇپايمەن ءبىرىنشى ورىندا تۇر. «ءال-ناسر» وسى توپتا مەرزىمىنەن بۇرىن ءبىرىنشى ورىنعا شىعىپ، بيىلعى ماۋسىمداعى چەمپيوندار ليگاسىنىڭ پلەي-وفف كەزەڭىنە جولداما الدى.
ەكىنشى ورىندا 8 ۇپايمەن يراندىق «پەرسەپوليس» تۇر. بۇل كوماندانىڭ كەلەسى كەزەڭگە ءوتۋ مۇمكىندىگى ءالى دە بار. قاتاردىڭ «اد-دۋحايل» كومانداسى 4 ۇپايمەن ءۇشىنشى ورىندا. سوڭعى ورىندا 2 ۇپايمەن تاجىكستاننىڭ «يستيقلولى» تۇر. بۇل ەكى كوماندا دا وسى ماۋسىمدا ودان ءارى باسەكەگە ءتۇسۋ مۇمكىندىگىنەن ايىرىلدى.
«يستيقلول» تەڭ ەسەپ كورسەتەدى»
فۋتبول ساراپشىلارى ازيالىق تەكەتىرەستەگى حالىق نازارىنداعى ماتچقا باعا بەرىپ ۇلگەردى. ولار تاجىكتەر ءوز الاڭىندا رونالدۋنىڭ قۇراماسىنا باسىمدىق بەرمەيدى دەپ وتىر.
دۋشانبە قۇراماسىنىڭ باس باپكەرى يگور چەرەۆچەنكو الدىڭعى ماتچ تۋرالى:
«بالالىق قاتەلىكتىڭ سالدارىنان ەكى بىردەي جانە ۇياتتاۋ گول جىبەرىپ الدىق. ويىنعا كەلسەك، جىگىتتەرگە وكپەم جوق. ماتچتا گول سوعاتىن جاقسى مۇمكىندىكتەرىمىز دە بولدى. بىراق، وكىنىشكە قاراي، ولاردى جۇزەگە اسىرۋ مۇمكىن بولمادى» دەدى ول.
تاجىكستان قۇراماسىنىڭ بۇرىنعى ويىنشىسى، قازىرگى باپكەر حيكمات فۋزايلوۆ «يستيقلول» مەن «ءال-ناسر» كەزدەسۋى تەڭ اياقتالادى دەيدى:
«دۋشانبە ستاديونىنىڭ جاساندى الاڭى مەن جانكۇيەرلەردىڭ قولداۋى سياقتى فاكتورلار دا تەڭ ناتيجەدەگى ويىندى سيپاتتايدى. ونىڭ ۇستىنە تاپسىرما ورىندالدى، كوماندا توپتان ءبىرىنشى ورىنمەن شىعىپ تۇر. بىراق «يستيقلول» ءوز نامىسى، جانكۇيەرلەرى ءۇشىن كۇرەسەدى، بۇل ءسوزسىز. ناتيجەسىندە تەڭ ويىن بولادى»، - دەپ بولجامىن تۇيىندەدى فۋزايلوۆ.
ەسكە سالا كەتەيىك، كريشتيانۋ رونالدۋنىڭ بيىلعى قىركۇيەك ايىندا تەگەرانعا كەلۋى جەرگىلىكتى جانكۇيەرلەر اراسىندا ۇلكەن شۋعا ۇلاسقان ەدى.
مىڭداعان جانكۇيەر يران استاناسىن لىق تولتىرىپ، جول بويىندا جانە پورتۋگالدىق فۋتبولشى تۇرعان قوناقۇي ماڭىن تورۋىلداعان بولاتىن. ءوز كۋميرلەرىن تىرىدەي كورەتىنىنە سەنبەگەن يراندىق جانكۇيەرلەرى كوز جاستارىنا ەرىك بەرگەن ەدى. ال رۋداكيدىڭ ەلىنە كەلەدى دەگەن رۋنالدۋنىڭ سوڭعى ساتتە كەلمەيتىنى بەلگىلى بولدى.
دينا ليتپين،
«ادىرنا» ۇلتتىق پورتالى
