قازاقستاننىڭ اقش-تاعى ەلشىلىگى امەريكا قۇراما شتاتتارىندا كوشى-قون ساياساتىنىڭ قاتاڭداۋى مەن ەل شەكاراسىن قورعاۋ جانە زاڭسىز ميگراتسيانى ازايتۋعا باعىتتالعان شارالارعا بايلانىستى مالىمدەمە جاسادى، دەپ حابارلايدى «ادىرنا» ءتىلشىسى.
«ەل بيلىگى ميگراتسيالىق ساياساتتى بارىنشا قاتاڭداتتى. قولعا العان شارالار اقش-قا زاڭسىز كەلگەن شەتەلدىكتەرگە جانە ميگرانتتارعا قاتىستى بولىپ وتىر. قاماۋعا الۋ جانە ەلدەن شىعارۋ سىندى ماجبۇرلەۋ شارالارىمەن قاتار، اقش-قا قايتا كىرۋگە شەكتەۋلەر ەنگىزىلىپ، سونداي-اق الەۋمەتتىك كومەك، جۇمىس ىستەۋگە رۇقسات بەرەتىن قۇجاتتار مەن باسقا دا الەۋمەتتىك جەڭىلدىكتەردى جويۋ قاراستىرىلۋدا»، – دەلىنگەن حابارلامادا.
ەلشىلىك Aقش اۋماعىندا جۇرگەن قازاقستاندىقتارعا بيلىك تالاپتارىن قاتاڭ ساقتاۋ كەرەكتىگىن اتاپ ءوتتى. ايتۋلارىنشا، اقش زاڭسىز نەگىزدە جۇرگەن شەتەلدىكتەرگە ەلدەن ءوز ەركىمەن كەتۋگە مۇمكىندىك بەرىپ وتىر.
«بۇل شارا قازاقستان ازاماتتارىنىڭ دەپورتاتسياعا ۇشىراۋ قاۋپىن ازايتۋعا جانە ونىڭ سالدارىنان بولاشاقتا اقش ۆيزاسىنا ءوتىنىش بەرگەندە ەل اۋماعىنا كىرۋگە تىيىم سالىنۋىنان ساقتانۋعا كومەكتەسەدى»،—دەلىنگەن حابارلامادا.
بۇدان بولەك تاعى بىرنەشە وزگەرىس ەنگىزىلدى:
«مەكسيكادا قالىڭىز» ساياساتى قايتا ەنگىزىلدى: Aقش پەن مەكسيكا شەكاراسىن زاڭسىز كەسىپ وتكەن جانە اقش-تان باسپانا سۇراعان ميگرانتتار سوت شەشىمىن كۇتكەنشە، مەكسيكا اۋماعىندا قالۋعا مىندەتتەلەدى.
«ۇستا جانە بوسات» باعدارلاماسىنىڭ كۇشى جويىلدى: بۇدان بىلاي شەكارادا ۇستالعان ميگرانتتار سوت شەشىمىن كۇتپەي، اقش اۋماعىنان بوساتىلمايدى. ولار ارنايى ورتالىقتاردا ۇستالادى، ءوز ەلىنە قايتارىلىپ نەمەسە ءۇشىنشى ەلدەرگە جىبەرىلەدى.
CBP One قوسىمشاسىن قولدانۋ توقتاتىلدى: بۇرىن بۇل قوسىمشا شەتەلدىكتەرگە شارتتى تۇردە ەلگە كىرۋ ءۇشىن قولدانىلاتىن، بىراق ەندى بۇل مۇمكىندىك جويىلدى.
