رەسەيدىڭ ليۋكس ساناتىنداعى اۆتوكولىك ءوندىرۋشىسى Aurus ەلابۋگا قالاسىنداعى زاۋىتىندا ءوندىرىستى ۋاقىتشا توقتاتتى، دەپ حابارلايدى “ادىرنا” پورتالى ArbatMedia-عا سىلتەپ.
رەسمي تۇسىندىرمەدە كونۆەيەردىڭ توقتاۋى تۇگەندەۋ جۇمىستارىنا بايلانىستى دەلىنگەنىمەن، ساراپشىلار مۇنىڭ نەگىزگى سەبەبى — سۇرانىستىڭ ازايۋى ەكەنىن ايتادى.
قۇنى 50–70 ميلليون رۋبل بولاتىن ليۋكس ساناتىنداعى سەدانداردىڭ نەگىزگى ساتىپ الۋشىلارى مەملەكەتتىك ورگاندار مەن مەملەكەت قاتىساتىن ءىرى كومپانيالار بولعان. ولاردىڭ ساتىپ الۋلارى اياقتالعاننان كەيىن جاڭا تاپسىرىستار تۇسپەگەن – جەكە كليەنتتەر مۇنداي سوماعا كولىك الۋعا دايىن ەمەس.
حالىقارالىق نارىققا شىعۋ ارەكەتتەرى دە ناتيجە بەرمەدى. شەتەلدەگى سۇرانىس وتە تومەن بولدى. ءتىپتى Aurus كولىگىن سىيلىققا الىپ، ونى سىناپ كورگەن سولتۇستىك كورەيا باسشىسى كيم چەن ىن دا Mercedes-Maybach ماركاسىن پايدالانۋدى جالعاستىرىپ وتىر.
قازىرگى ۋاقىتتا زاۋىتتىڭ تاپسىرىستار پورتفەلى جوق، ال جينالعان بەرەشەك كولەمى 80 ميلليون ەۋرودان اسادى.
