مادەنيەت جانە اقپارات ءمينيسترى ايدا بالاەۆا ءدىني اعىمداردىڭ كۇشەيگەنىن جانە ءدىن تۋرالى زاڭ قايتا قارالاتىنىن ايتتى، دەپ حابارلايدى “ادىرنا” ۇلتتىق پورتالى.
ءمينيستردىڭ ايتۋىنشا، تەرروريزم جانە ءدىني ەكسترەميزم قاعيدالارىن قامتيتىن 14 860 ماتەريال انىقتالعان.
«ماسەلە حالىقتىڭ دىندارلىعىندا ەمەس، ءدىني ساۋاتسىزدىعىندا. ارينە، بۇگىندە ءداستۇرلى اعىمدارمەن قاتار ءداستۇرلى ەمەس ءدىني اعىمداردىڭ بەلسەندى جۇمىس ىستەپ جاتقانىن كورىپ وتىرمىز. سوندىقتان بۇل باعىتتا مينيسترلىك ءۇش باعىت بويىنشا جۇمىس جۇرگىزەدى: تاۋلىك بويى مونيتورينگ، اسىرەسە الەۋمەتتىك جەلىلەر مەن ينتەرنەت-باسىلىمداردا دەسترۋكتيۆتى سيپاتتاعى ماتەريالداردى انىقتاۋ. 1 قاڭتار مەن قىركۇيەك ايىنىڭ سوڭىنا دەيىنگى كەزەڭدە ينتەرنەتتە ۇگىت-ناسيحات، تەرروريزم جانە ءدىني ەكسترەميزم قاعيدالارىن قامتيتىن 14 860 ماتەريال انىقتالدى.
بۇل وسىنداي ءدىني اعىمداردىڭ جۇمىسىنىڭ كۇشەيگەنىن كورسەتەدى. ارينە، ءبىز دەپۋتاتتارىمىزدىڭ وتىنىشتەرىن مۇقيات تىڭداپ، زەردەلەيمىز. ارينە، بۇل باعىتتا «ءدىن تۋرالى» زاڭنىڭ كەيبىر نورمالارىن قايتا قاراۋ بويىنشا جۇمىس ىستەيمىز، - دەدى ايدا بالاەۆا ورتالىق كوممۋنيكاتسيالار قىزمەتىندەگى بريفينگتە.
