اقتاۋدا تانىمال بلوگەر ازامات سارسەنباەۆ 20 تاۋلىككە اكىمشىلىك قاماۋعا الىندى، دەپ حابارلايدى "ادىرنا" ۇلتتىق پورتالى.
بۇل تۋرالى بلوگەردىڭ ءوزى Instagram پاراقشاسىندا مالىمدەدى. ونىڭ ايتۋىنشا، سوت شەشىمى قر اكىمشىلىك قۇقىق بۇزۋشىلىق تۋرالى كودەكسىنىڭ 73-بابى («جالا جابۋ») بويىنشا شىققان.
بلوگەردىڭ سوزىنشە، اكىمشىلىك ءىس ونىڭ الەۋمەتتىك جەلىدە جاريالاعان پىكىرلەرىنەن كەيىن قوزعالعان. ول جازباسىندا دونەر ساتاتىن ءدامحانا يەسى مەن كەلۋشى اراسىنداعى جانجالعا بايلانىستى ءوز ويىن ءبىلدىرىپ، كاسىپكەردىڭ سوزدەرىن كەلتىرگەن.
«مەنى سوت شەشىمىمەن 20 تاۋلىككە جاپتى. بۇل – تولىق زاڭسىزدىق. قازىر ارنايى قابىلداۋ ورنىنا بارا جاتىرمىن، اپەللياتسيا شەشىمىنە دەيىن سوندا بولامىن. ەندى بيلىككە سىن ايتقان ءاربىر ادام تۇرمەگە ءتۇسۋى مۇمكىن»، — دەدى ازامات سارسەنباەۆ.
بۇعان دەيىن بلوگەر اقتاۋداعى قوعامدىق تاماقتانۋ نۇكتەلەرىنىڭ بىرىنە سىبايلاس جەمقورلىققا قارسى قىزمەت قىزمەتكەرلەرى قامقورلىق جاسايدى دەپ مالىمدەگەن. ول اتالمىش نىساننىڭ زاڭسىز تۇرعىزىلعانىن، قۇرىلىس كەزىندە ەرەجەلەردىڭ ساقتالماعانىن ايتقان بولاتىن. وسىدان كەيىن ماڭعىستاۋ وبلىسى بويىنشا انتيكوررۋپتسيالىق قىزمەت بلوگەردى «ابىروي مەن ار-نامىستى قورعاۋ» ماقساتىندا سوتقا بەرگەن.
