وزبەكستاندا ءامىر تەمىردىڭ تۋعانىنا 690 جىل تولۋىنا ارنالعان حالىقارالىق عىلىمي كونفەرەنتسيا ءوتتى. Report اگەنتتىگىنىڭ حابارلاۋىنشا، فورۋم شاۆكات ميرزيوەۆتىڭ باستاماسىمەن ۇيىمداستىرىلعان، دەپ حابارلايدى “ادىرنا”.
فورۋمعا 20-دان استام ەلدەن 300-دەن استام عالىم، ساراپشى، ديپلومات جانە قوعام وكىلدەرى قاتىستى.
قاتىسۋشىلار قاتارىندا جەتەكشى حالىقارالىق ۇيىمداردىڭ، عىلىمي ورتالىقتاردىڭ، ۋنيۆەرسيتەتتەردىڭ، سونداي-اق مۇراجايلار مەن كىتاپحانالاردىڭ وكىلدەرى بار. بۇل ءوڭىردىڭ تاريحي-مادەني مۇراسىنا دەگەن جاھاندىق قىزىعۋشىلىقتىڭ ارتىپ كەلە جاتقانىن كورسەتەدى.
وزبەكستان پرەزيدەنتى شاۆكات ميرزيوەۆتىڭ كونفەرەنتسيا قاتىسۋشىلارىنا ارناپ جولداعان قۇتتىقتاۋىن مەملەكەتتىك كەڭەسشى، حالىق جازۋشىسى حايريددين سۇلتانوۆ وقىپ بەردى.
ءوز ۇندەۋىندە مەملەكەت باسشىسى قاتىسۋشىلاردى فورۋمنىڭ اشىلۋىمەن قۇتتىقتاپ، ءامىر تەمىردىڭ مۇراسىن زەرتتەۋ جانە ناسيحاتتاۋ جۇمىستارىنىڭ ماڭىزدىلىعىن اتاپ ءوتتى. ول ءامىر تەمىردى ۇلى مەملەكەت قايراتكەرى، كورنەكتى قولباسشى ءارى عىلىم، مادەنيەت جانە ونەردىڭ قامقورشىسى رەتىندە سيپاتتادى.
«وزبەكستاننىڭ مىڭجىلدىق عىلىمي جانە مادەني مۇراسىنىڭ بىرەگەي ۇلگىلەرى شوعىرلانعان يسلام وركەنيەتى ورتالىعىندا كونفەرەنتسيا وتكىزۋ – ءوڭىر تاريحىنداعى ەڭ جارقىن كەزەڭدەردىڭ ءبىرى سانالاتىن تەمىر اۋلەتى ءداۋىرىن تەرەڭ تالداۋ ءۇشىن ەرەكشە ماڭىزعا يە»، – دەلىنگەن پرەزيدەنت ۇندەۋىندە.
سونداي-اق، جاڭا وزبەكستاندا ۇلتتىق تاريح پەن مادەني مۇرانى زەرتتەۋ جانە ناسيحاتتاۋ، سونداي-اق جاستاردى جالپىادامزاتتىق قۇندىلىقتار رۋحىندا تاربيەلەۋ باعىتىندا اۋقىمدى جۇمىستار جۇرگىزىلىپ جاتقانى اتاپ ءوتىلدى. وسىعان بايلانىستى جىل سايىن ءساۋىر ايىندا ءامىر تەمىرگە ارنالعان تاقىرىپتىق ءىس-شارالار وتكىزۋ تۋرالى شەشىم قابىلدانعان.
