بوراننىڭ سالدارى. جامبىل جانە شقو ايماقتارىندا جول قوزعالىسى شەكتەلدى

ەلىمىزدە اۋا رايىنىڭ قولايسىز جاعدايىنا بايلانىستى بىرنەشە ايماقتا جول قوزعالىسى شەكتەلدى، دەپ حابارلايدى "ادىرنا" ۇلتتىق پورتالى.  جامبىل وبلىسىنداعى قوزعالىس شەكتەۋلى ايماقتاردا شامامەن 2 مىڭعا جۋىق كولىك جولدا تۇرىپ قالعان. ايماقتىڭ پوليتسيا دەپارتامەنتىنىڭ ايتۋىنشا، 1385 جۇك كولىگى مەن 25 اۆتوبۋس جولدا قالعان. پاترۋلدىك پوليتسەيلەر جۇرگىزۋشىلەر مەن جولاۋشىلاردى جىلىتۋ ورىندارىنا ورنالاستىرعان. جولدا قالعان ادامدار جىلىتۋ ورىندارىندا دەمالىپ، اۋا-رايىنىڭ تۇراقتالعانىن كۇتە الادى. سونىمەن قاتار جۇرگىزۋشىلەر ىستىق شايمەن قامتاماسىز ەتىلۋدە. قار قۇرساۋىندا قالعان كولىك جولاۋشىلارى اۆتوبۋسپەن، پوليتسيانىڭ قاداعالاۋىمەن، تەمىرجول ۆوكزالىنا جەتكىزىلىپ، ۇيلەرىنە جىبەرىلەدى. شىعىس قازاقستان وبلىسىندا دا جول قوزعالىسى قيىنداپ،  100-دەن استام كولىك قار قۇرساۋىندا قالعان. جىلدامدىعى سەكۋندىنا 30 مەترگە جەتەتىن قاتتى جەل مەن بوران سوعىپ، كورىنۋ دەڭگەيى نولگە دەيىن تومەندەپ، قاردىڭ قالىڭدىعىنان قوزعالىس شەكتەلگەن. پوليتسيا قىزمەتكەرلەرى وقيعا ورنىنا جەدەل جەتىپ، جۇرگىزۋشىلەر مەن جولاۋشىلاردى قاۋىپسىز ايماقتارعا ەۆاكۋاتسيالادى. زارداپ شەككەندەر جوق. ساعات 17:30-دان باستاپ «وسكەمەن – گورنايا ۋلبينكا – سەۆەرنوە» وبلىستىق جولىنىڭ ۋچاسكەسى (30-60 كم، زويا كوسمودەميانسكايا اتىنداعى بالالار لاگەرى) جابىلدى. پوليتسيا قىزمەتكەرلەرى جۇرگىزۋشىلەردى اۋا رايىنىڭ قولايسىزدىعىندا جولعا شىقپاۋعا جانە كولىكتىڭ تەحنيكالىق جاعدايىن تەكسەرۋگە شاقىرادى.